தூய்மை நகரங்களில் மாநிலத்தில் முதலிடம்: நாமக்கல் மாநகராட்சிக்கு மத்திய அரசு விருது

தமிழகத்தில் தூய்மை மிகுந்த நகரங்களில் நாமக்கல் மாநகராட்சி முதலிடம் பிடித்து, மத்திய அரசின் 'ஸ்வச் சர்வேஷான்-2024' விருதை பெற்றுள்ளது.

- 

நாமக்கல், ஜூலை 18: புது தில்லியில் நடைபெற்ற விழாவில் மாநகராட்சி மேயர் து.கலாநிதி, துணை மேயர் செ.பூபதி ஆகியோர் இவ்விருதை பெற்றனர்.

மத்திய வீட்டுவசதி மற்றும் நகர்ப்புற விவகார அமைச்சகம் மூலம் இந்தியா முழுவதும் உள்ள நகரங்களில் தூய்மை இந்தியா கணக்கெடுப்பு ஆண்டுதோறும் நடத்தப்பட்டு வருகிறது. 2024-இல் திடக்கழிவு மேலாண்மை திட்டத்தின் கீழ் சேகரிக்கப்பட்ட விவரங்கள் நேரடி ஆய்வின் மூலம் உறுதி செய்யப்பட்டு மதிப்பெண் மற்றும் தரவரிசை வழங்கப்படுகிறது. தரவரிசை வழங்க ஆய்வு மேற்கொள்ள இப்சோஸ் என்ற நிறுவனத்தை மத்திய அரசு நியமித்துள்ளது. இந்நிறுவனம் மூலம் நியமிக்கப்பட்டோர் கடந்த மார்ச் 18 முதல் 25-ஆம் தேதி வரை, நாமக்கல் மாநகராட்சியில் உள்ள 39 வார்டுகளிலும் களஆய்வு மேற்கொண்டனர்.