தாய்லாந்து பிரதமர் பேடோங்டார்ன் ஷினவத்ரா இடைநீக்கம்

கம்போடியாவின் முன்னாள் பிரதமர் ஹன் சென்னுடனான சர்ச்சைக்குரிய தொலைபேசி உரையாடல் தொடர்பாக, தாய்லாந்து பிரதமர் பேடோங்டார்ன் ஷினவத்ராவை அந்த நாட்டு அரசியல் சாசன நீதிமன்றம் இடைநீக்கம் செய்து செவ்வாய்க்கிழமை உத்தரவிட்டது.

- 

பாங்காக், ஜூலை 1:

தாய்லாந்துக்கும் கம்போடியாவுக்கும் இடையே நீண்டகால எல்லைப் பிரச்னை உள்ளது. இந்தச் சூழலில், எல்லைப் பகுதியில் இரு நாட்டுப் படையினருக்கும் இடையே கடந்த மே 28-ஆம் தேதி மோதல் ஏற்பட்டது. இதில் ஒரு கம்போடிய வீரர் உயிரிழந்தார்.

இந்த விவகாரம் தொடர்பாக இரு நாடுகளுக்கும் இடையே பதற்றம் உச்சத்தில் இருந்தபோது, கம்போடியாவின் முன்னாள் பிரதமரும், அந்த நாட்டு மேலவையான செனட் அவையின் தற்போதைய தலைவருமான ஹன் சென்னுடன் பிரதமர் பேடோங்டார்ன் அண்மையில் தொலைபேசியில் உரையாடினார். இந்த உரையாடல் பதிவு பின்னர் பொதுவெளியில் கசிந்து மிகப் பெரிய சர்ச்சையை ஏற்படுத்தியது.

அந்த உரையாடலின்போது, தனது தந்தையும், முன்னாள் தாய்லாந்து பிரதமருமான தக்சின் ஷினவத்ராவின் நண்பர் ஹன் சென்னை 'அங்கிள்' என்று நெருக்கத்துடன் அழைத்த பேடோங்டார்ன், கம்போடியாவுக்கு ஆதரவாகவும், தாய்லாந்து நலன்களுக்கு எதிராகவும் பேசியதாகக் குற்றஞ்சாட்டப்படுகிறது.