மத்தியஸ்தத்தை இந்தியா ஒருபோதும் ஏற்காது

டிரம்ப்பிடம் பிரதமர் மோடி திட்டவட்டம்

- 

கனடாவின் கனானாஸ்கிஸ் நகரில் ஜூன் 18 அன்று, இந்தியா ஒருபோதும் மத்தியஸ்தத்தை ஏற்காது என்று அமெரிக்க அதிபர் டொனால்ட் டிரம்ப்பிடம் பிரதமர் நரேந்திர மோடி திட்டவட்டமாகத் தெரிவித்தார்.

மேலும், ஆபரேஷன் சிந்தூர் நடவடிக்கையின்போது பாகிஸ்தான் கோரிக்கை விடுத்ததன் அடிப்படையிலேயே சண்டை நிறுத்தத்துக்கு இந்தியா ஒப்புக்கொண்டது. அமெரிக்காவின் மத்தியஸ்தமோ அல்லது வர்த்தகம் நிறுத்தப்படும் என்ற அமெரிக்காவின் எச்சரிக்கையோ சண்டை நிறுத்தத்துக்குக் காரணம் அல்ல என்றும் டிரம்ப்புடன் செவ்வாய்க்கிழமை நடைபெற்ற 35 நிமிட தொலைபேசி உரையாடலின்போது பிரதமர் மோடி தெரிவித்தார்.

கனடாவில் செவ்வாய்க்கிழமை நடைபெற்ற ஜி7 உச்சி மாநாட்டில் பிரதமர் மோடி, அதிபர் டிரம்ப் உள்ளிட்டோர் பங்கேற்றனர். இந்த மாநாட்டுக்குப் பிறகு பிரதமர் மோடியும், அதிபர் டிரம்ப்பும் சந்தித்து கலந்துரையாட இருந்தனர். ஆனால், ஜி7 மாநாட்டில் இருந்து அதிபர் டிரம்ப் முன்கூட்டியே புறப்பட்டதால், இரு தலைவர்களின் சந்திப்பு நிகழவில்லை. அதன் காரணமாக, இரு தலைவர்களும் செவ்வாய்க்கிழமை மாலை தொலைபேசி வாயிலாக கலந்துரையாடினர்.

இந்தக் கலந்துரையாடல் குறித்து வெளியுறவுச் செயலர் விக்ரம் மிஸ்ரி கூறியதாவது: பிரதமர் மோடியுடன் கலந்துரையாட வேண்டும் என்று அதிபர் டிரம்ப் வலியுறுத்தியதன் அடிப்படையில், இரு தலைவர்களிடையே தொலைபேசி வழி கலந்துரையாடலுக்கு ஏற்பாடு செய்யப்பட்டது.

இந்தக் கலந்துரையாடலின் போது, கடந்த ஏப்ரல் 22-ஆம் தேதி நிகழ்ந்த பஹல்காம் பயங்கரவாதத் தாக்குதலுக்குப் பிறகு பயங்கரவாதத்துக்கு எதிராக தீவிர நடவடிக்கை மேற்கொள்ளும் இந்தியாவின் தீர்மானத்தை டிரம்ப்பிடம் பிரதமர் மோடி விவரித்தார்.