இனி முதலீடு... தங்கத்தில்!

துப்பாக்கியால் சுடும் போரை விட வரி விதிப்புப் போரையே விரும்புவதாக டிரம்ப் வெளிப்படையாக அறிவித்தார். அவை அனைத்தும் டிரம்ப்பின் உலகமயமாக்கல் மற்றும் தடை இல்லாத உலக வர்த்தகத்தின் மீதான அவரது நன்கு அறியப்பட்ட வெறுப்பையே பிரதிபலித்தன.

- முனைவர் டி.கே. ஜயராமன்

கடந்த ஆகஸ்ட் 2024 -இல், அமெரிக்க ஜனாதிபதி பதவிக்கான தேர்தலுக்கு, குடியரசுக் கட்சி வேட்பாளராக டொனால்ட் டிரம்ப் அறிவிக்கப்பட்டதிலிருந்து, அமெரிக்காவின் அரசியல் மற்றும் பொருளாதார நிச்சயமற்ற தன்மைகள் உலகையே ஆக்கிரமிக்கத் தொடங்கின. அவரது பிரசார வாக்குறுதிகள் கார்ப்பரேட் வரியை 25 சதவீதத்திலிருந்து 15 சதவீதமாகக் குறைப்பதன் மூலமும், பிற நாடுகளிலிருந்து உயர்தர நுகர்வோர் பொருள்களை உற்பத்தி செய்யும் அமெரிக்க நிறுவனங்களைத் திரும்பி வரத் தூண்டுவதன் மூலமும் அமெரிக்காவை மீண்டும் சிறந்ததாக்குவது என்பது அவரது குறிக்கோள். மேலும் இறக்குமதி செய்யும் இந்தியா உட்பட அனைத்து நாடுகளும் அமெரிக்காவின் இறக்குமதி வரி சராசரி 3 சதவீதத்துக்கு மேல் இல்லை என்றாலும், அமெரிக்காவின் இறக்குமதிகள் மீது 150 சதவீதம் வரை வரி விதிப்பதன் மூலம் அமெரிக்காவின் தாராள மனப்பான்மையை துஷ்பிரயோகம் செய்கின்றன என்று டிரம்ப் குற்றம் சாட்டினார்.

அண்டை நாடுகளான கனடா, மெக்ஸிகோ மற்றும் உலகின் இரண்டாவது சக்தி வாய்ந்த பொருளாதாரமான சீனா ஆகியவற்றின் அமெரிக்காவுக்கான வருடாந்திர ஏற்றுமதிகள் அமெரிக்காவிலிருந்து ஆண்டுதோறும் இறக்குமதி செய்வதை விட அதிகமாக வளர்ந்து வருவதால், அவற்றின் வர்த்தக உபரிகள் அதிகரித்து வருகின்றன. 2024 -ஆம் ஆண்டுக்கு, கனடா (102 பில்லியன் டாலர்), மெக்சிகோ (172 பில்லியன் டாலர்) மற்றும் சீனாவின் (295 பில்லியன் டாலர்) வர்த்தக உபரிகள் அதற்கேற்ப உள்ளன. 2024 -ஆம் ஆண்டுக்கான இந்தியாவின் வர்த்தக உபரியும் 46 பில்லியன் டாலர் ஆகும். இறக்குமதி வரிகள் உயர்த்தப்படும் எனும் தேர்தல் வாக்குறுதி அச்சுறுத்தலாக இருந்தது. துப்பாக்கியால் சுடும் போரை விட வரி விதிப்புப் போரையே விரும்புவதாக டிரம்ப் வெளிப்படையாக அறிவித்தார்.

அவை அனைத்தும் டிரம்ப்பின் உலகமயமாக்கல் மற்றும் தடை இல்லாத உலக வர்த்தகத்தின் மீதான அவரது நன்கு அறியப்பட்ட வெறுப்பையே பிரதிபலித்தன. டிரம்ப்பின் தேர்தல் வெற்றி உறுதி செய்யப்படுவதற்கு முன்பே, அவரது அச்சுறுத்தல்கள் முக்கியமான (மூலதன, அந்நிய செலாவணி, மற்றும் தங்கம்) மூன்று உலகச் சந்தைகளை உலுக்கத் தொடங்கின. டிரம்ப்பின் தேர்தல் பிரசாரம், ஜனவரி 20, 2025 -இலிருந்து அவரது முதல் மூன்று மாத ஆட்சி ஆகியவற்றின் உலகச் சந்தைகள் மீதான தாக்கங்களைப் பகுப்பாய்வு செய்வோம்.