நாடாளுமன்றத்தில் வக்ஃப் மசோதா நிறைவேற்றம்

மாநிலங்களவையில் ஆதரவு 128 - எதிர்ப்பு 95

- 

புது தில்லி, ஏப். 4: மாநிலங்களவையில் 13 மணி நேரத்துக்கும் மேல் நடைபெற்ற விவாதத்துக்குப் பின்னர், வக்ஃப் சட்டத் திருத்த மசோதா வெள்ளிக்கிழமை (ஏப்.4) அதிகாலை நிறைவேற்றப்பட்டது.

மசோதாவுக்கு ஆதரவாக 128 வாக்குகளும் எதிராக 95 வாக்குகளும் பதிவாகின.

மக்களவையில் ஏற்கெனவே இந்த மசோதா நிறைவேற்றப்பட்ட நிலையில், இரு அவைகளும் ஒப்புதல் அளித்துள்ளன. அடுத்தகட்டமாக குடியரசுத் தலைவரின் ஒப்புதல் பெறப்படும்.

நாட்டில் சமூக-மதப் பணிகளுக்காக நன்கொடையாக அளிக்கப்படும் வக்ஃப் சொத்துகளின் நிர்வாகத்தைச் சீரமைக்கும் நோக்கிலான வக்ஃப் சட்டத் திருத்த மசோதா-2025, மக்களவையில் கடந்த புதன்கிழமை (ஏப்.2) தாக்கல் செய்யப்பட்டு, 13 மணி நேரத்துக்கும் மேல் விவாதிக்கப்பட்டது. அன்றைய தினம் நள்ளிரவில் மசோதா நிறைவேற்றப்பட்டது.