வேளாண் உரங்களுக்கு ரூ.37,216 கோடி மானியம்: மத்திய அமைச்சரவை ஒப்புதல்

நிகழாண்டு காரீஃப் (கோடைப் பருவம்) பருவ காலத்தில் விளைநிலங்களில் உரிய அளவில் மண்ணுக்கு ஊட்டச் சத்தை வழங்கும் முயற்சியின் ஒரு பகுதியாக பாஸ்பேட்டிக், பொட்டாசிக் உரங்களுக்கான ரூ. 37,216 கோடி மானியத்துக்கு மத்திய அமைச்சரவை ஒப்புதல் அளித்தது.

- 

புது தில்லி, மார்ச் 28:

பிரதமர் நரேந்திர மோடி தலைமையில் புது தில்லியில் வெள்ளிக்கிழமை நடைபெற்ற பொருளாதார விவகாரத்துக்கான மத்திய அமைச்சரவைக் கூட்டத்தில், பாஸ்பேட்டிக், பொட்டாசிக் உரங்கள் மீதான 2025-ஆம் ஆண்டு காரீஃப் பருவத்துக்கான ஊட்டச்சத்து அடிப்படையிலான மானிய விகிதத்துக்கான இந்தப் பரிந்துரைக்கு ஒப்புதல் அளிக்கப்பட்டது.

இதுகுறித்து அமைச்சரவை கூட்டத்துக்குப் பிறகு செய்தியாளர்களுக்குப் பேட்டியளித்த மத்திய தகவல்-ஒலிபரப்புத் துறை அமைச்சர் அஸ்வினி வைஷ்ணவ் கூறியதாவது: நிகழாண்டு காரீஃப் பருவ உர மானியத்துக்கான நிதித் தேவை ரூ.37,216.15 கோடியாக இருக்கும் என கணக்கிடப்பட்டுள்ளது. அதன் அடிப்படையில், அளிக்கப்பட்ட பரிந்துரைக்கு மத்திய அமைச்சரவை ஒப்புதல் அளித்துள்ளது.

இதன் மூலம், டிஏபி (டிஐ அம்மோனியம் பாஸ்பேட்) உரத்துக்கான விலை தொடர்ந்து அதே நிலையில் இருப்பதை மத்திய அரசு உறுதி செய்துள்ளது. மேலும், உரங்கள் மற்றும் உள்ளீடுகளின் சர்வதேச விலை நிலவரத்துக்கேற்ப பாஸ்பேட்டிக், பொட்டாசிக் உரங்களுக்கான மானிய அளவை மத்திய அரசு நிர்ணயம் செய்துள்ளது.