பஹல்காம் தாக்குதல் பயங்கரவாதி உள்பட மூவர் சுட்டுக் கொலை

ஜம்மு-காஷ்மீர், ஸ்ரீநகரின் புறநகர் பகுதியில் உள்ள வனப் பகுதியில் ராணுவம் மேற்கொண்ட ‘ஆபரேஷன் மகாதேவ்’ நடவடிக்கையில், பஹல்காம் பயங்கரவாதத் தாக்குதலின் முக்கியக் குற்றவாளியாகக் கருதப்படும் சுலைமான் ஷா உள்பட மூன்று பயங்கரவாதிகள் சுட்டுக் கொல்லப்பட்டனர்.

- 

ஸ்ரீநகர், ஜூலை 28:

லஷ்கர்-ஏ-தொய்பா பயங்கரவாதிகளால் ரகசிய செய்திகளை அனுப்ப பயன்படுத்தும் தகவல்தொடர்பு சாதனத்தின் தொழில்நுட்ப சமிக்ஞை ஹார்வான் வனப் பகுதியிலிருந்து இம்மாத தொடக்கத்தில் கண்டறியப்பட்டது. இதையடுத்து, அப்பகுதியில் பயங்கரவாதிகளின் நடமாட்டத்தைப் பாதுகாப்புப் படையினர் கடந்த சில நாள்களாக மிக உன்னிப்பாகக் கண்காணித்து வந்துள்ளனர்.

இவ்வாறு பல நாள்கள் கவனமாகத் திட்டமிட்டு, ‘ஆபரேஷன் மகாதேவ்’ நடவடிக்கை திங்கள்கிழமை காலை செயல்படுத்தப்பட்டது. 24 ராஷ்ட்ரிய ரைஃபிள்ஸ் மற்றும் 4 பாரா படைப் பிரிவுகளைச் சேர்ந்த கமாண்டோக்கள் குழு, முல்நார் கிராமத்தைச் சுற்றிவளைத்து, தேடுதல் நடவடிக்கையைத் தொடங்கியது.