அமைச்சர் துரைமுருகன், குடும்பத்தினரை விடுவித்த உத்தரவு ரத்து

வருமானத்துக்கு அதிகமாக ரூ.3 கோடி சொத்து சேர்த்த வழக்கில், நீர்வளத் துறை அமைச்சர் துரைமுருகன் மற்றும் அவரது குடும்பத்தினரை விடுவித்து பிறப்பிக்கப்பட்ட உத்தரவை ரத்து செய்த சென்னை உயர் நீதிமன்றம், வழக்கை 6 மாதங்களுக்குள் விசாரித்து முடிக்க வேலூர் சிறப்பு நீதிமன்றத்துக்கு உத்தரவிட்டது.

- 

சென்னை, ஏப்.23:

கடந்த 1996 முதல் 2001 வரையிலான காலகட்டத்தில் பொதுப்பணித் துறை அமைச்சராக பதவி வகித்த துரைமுருகன் வருமானத்துக்கு அதிகமாக ரூ.3 கோடியே 92 லட்சம் அளவுக்கு சொத்து சேர்த்ததாக ஊழல் தடுப்புத் துறை தரப்பில் 2002-இல் வழக்கு தொடரப்பட்டது.

அமைச்சர் துரைமுருகன், அவரது மனைவி, மகன், மருமகள் மற்றும் சகோதரர் மீது தொடரப்பட்ட வழக்கிலிருந்து அவர்களை விடுவித்து வேலூர் நீதிமன்றம் 2007-இல் உத்தரவிட்டது.

இந்த உத்தரவை எதிர்த்து 2013-இல் அதிமுக ஆட்சியில் மறு ஆய்வு மனு தாக்கல் செய்யப்பட்டது. இந்த மனுவை நீதிபதி வேல்முருகன் விசாரித்தார். ஊழல் தடுப்புத் துறை தரப்பில் ஆஜரான கூடுதல் தலைமை வழக்குரைஞர் ரவீந்திரன், வழக்கு தொடர்பான முதல் தகவல் அறிக்கை மற்றும் குற்றப் பத்திரிகைகளை விளக்கி வாதிட்டார்.