ஐக்கிய அரபு அமீரக அதிபர் அல் நஹ்யான் இந்திய வருகை வர்த்தகத்தை 200 பில்லியன் டாலராக அதிகரிக்க இலக்கு

ஒருநாள் அரசு முறைப் பயணமாக ஐக்கிய அரபு அமீரக (யுஏஇ) அதிபர் ஷேக் முகமது பின் ஸாயத் அல் நஹ்யான் திங்கள்கிழமை இந்தியா வந்தார்.

- 

அவரின் முன்னிலையில் இந்திய-யுஏஇ இடையே பல்வேறு ஒப்பந்தங்கள் கையொப்பமான நிலையில், 2032-ஆம் ஆண்டுக்குள் இரு நாடுகளுக்கு இடையிலான வர்த்தகத்தை 200 பில்லியன் டாலராக (சுமார் ரூ. 18.17 லட்சம் கோடி) அதிகரிக்க இலக்கு நிர்ணயிக்கப்பட்டுள்ளது.தில்லி வந்த அல் நஹ்யான்னை, விமான நிலையத்துக்குச் சென்று பிரதமர் மோடி ஆரத்தழுவி வரவேற்றார். இதைத்தொடர்ந்து பிரதமர் இல்லத்துக்கு இருவரும் ஒரே காரில் சென்றனர். அங்கு அவர்கள் பேச்சுவார்த்தை நடத்தினர்.

இதுகுறித்து வெளியுறவு அமைச்சக செயலர் விக்ரம் மிஸ்ரி செய்தியாளர்களிடம் கூறியதாவது:

இந்தியா-யுஏஇ இடையே புதிதாக, வளர்ந்து வரும் துறைகளில் ஒத்துழைப்பு நிலவுவது குறித்து பிரதமர் மோடி, அதிபர் அல் நஹ்யான் இடையே பேச்சுவார்த்தை நடைபெற்றது. இந்தியாவில் அணுமின் உற்பத்தியில் தனியார் நிறுவனங்களை அனுமதிக்கும் சட்டம் இயற்றப்பட்டுள்ள நிலையில், அணுசக்தி ஒத்துழைப்பு குறித்தும் அவர்கள் பேசினர்.

யேமன், காஸா, ஈரான் விவகாரங்கள் குறித்தும் அவர்கள் கலந்துரையாடினர். எல்லை தாண்டிய பயங்கரவாதத்துக்கு இருவரும் கண்டனம் தெரிவித்தனர்.