மைசூரில் தசரா திருவிழா கோலாகல தொடக்கம்

எழுத்தாளர் பானு முஷ்தாக் தொடங்கிவைத்தார்

- 

உலகப் புகழ்பெற்ற தசரா திருவிழா மைசூரில் திங்கட்கிழமை கோலாகலமாக தொடங்கியது. சர்வதேச புக்கர் பரிசு பெற்ற கன்னட எழுத்தாளர் பானு முஷ்தாக் விழாவைத் தொடங்கி வைத்தார்.

கர்நாடக வரலாற்றில் முக்கியத்துவம் வாய்ந்த, உலகப் புகழ் பெற்ற தசரா திருவிழா 415-ஆம் ஆண்டாக மைசூரில் உற்சாகத்துடன் கோலாகலமாக தொடங்கியது. மைசூரு, சாமுண்டி மலையில் அமைந்துள்ள சாமுண்டீஸ்வரி கோயிலில் காலை 10.10 மணி அளவில் கன்னடர்களின் குலதெய்வமாக போற்றப்படும் சாமுண்டீஸ்வரி அம்மனுக்கு சிறப்பு பூஜை செய்ததன் மூலம் தசரா திருவிழாவை சர்வதேச புக்கர் விருதுபெற்ற கன்னட எழுத்தாளர் பானு முஷ்தாக் தொடங்கிவைத்தார்.

முன்னதாக, தசரா திருவிழாவை பானு முஷ்தாக் தொடங்கிவைப்பதற்கு பாஜக உள்ளிட்ட கட்சிகள் கடும் எதிர்ப்பு தெரிவித்து போராட்டங்களிலும் ஈடுபட்டன.

இது தொடர்பாக கர்நாடக உயர் நீதிமன்றத்தில் தொடரப்பட்டிருந்த பொதுநல மனு தள்ளுபடி செய்யப்பட்டது. அதை எதிர்த்து உச்சநீதிமன்றத்தில் தொடரப்பட்ட மேல்முறையீட்டு மனுவும் தள்ளுபடி செய்யப்பட்டது.