ஜூலை 14 முதல் பி.இ., பொதுக் கலந்தாய்வு

தரவரிசைப் பட்டியலில் 144 மாணவர்கள் 200 மதிப்பெண்

- 

சென்னை, ஜூன் 27: தமிழகத்தில் பொறியியல் சிறப்புப் பிரிவுகளுக்கான கலந்தாய்வு ஜூலை 7-ஆம் தேதியும், பொதுப் பிரிவு கலந்தாய்வு ஜூலை 14-ஆம் தேதி தொடங்குகிறது.

பொறியியல் படிப்புகளுக்கான தரவரிசைப் பட்டியலில் 144 மாணவ, மாணவிகள் 200-க்கு 200 மதிப்பெண் பெற்றுள்ளனர். கடந்த ஆண்டு 64 மாணவர்கள் முழு மதிப்பெண் பெற்றிருந்த நிலையில் நிகழாண்டு எண்ணிக்கை அதிகரித்திருக்கிறது.

தமிழகத்தில் 440-க்கும் மேற்பட்ட பொறியியல் கல்லூரிகள் உள்ளன. அண்ணா பல்கலைக்கழகத்தின் கீழ் செயல்படும் கல்லூரிகள், அரசுக் கல்லூரிகள், அரசு உதவி பெறும் கல்லூரிகள் என அனைத்து வகை பொறியியல் கல்லூரிகளும் இதில் அடங்கும். இந்தக் கல்லூரிகளில் பி.இ., பி.டெக். படிப்புகளில் ஏறத்தாழ 2 லட்சம் இடங்கள் அரசு ஒதுக்கீட்டு இடங்களாகும்.

இந்த இடங்களில் நிகழ்கல்வி யாண்டில் (2025-2026) சேருவதற்கான இணையவழி விண்ணப்பப் பதிவு கடந்த மே 7-ஆம் தேதி தொடங்கி, ஜூன் 6-ஆம் தேதி முடிவடைந்தது. இதையடுத்து, ரேண்டம் எண் கடந்த 11-ஆம் தேதி இணையவழியில் ஒதுக்கீடு செய்யப்பட்டது.

பொறியியல் சேர்க்கை சேவை மையங்களில் மாணவர்களின் சான்றிதழ்களை இணையவழியில் சரிபார்க்கும் பணி கடந்த 20-ஆம் தேதி முடிவடைந்தது.