திராவிட மொழிகளின் தாய் தமிழ்!

தமிழ் அல்லாத ஒரு மொழி திராவிட மொழிகளுக்குத் தாயாகத் தமிழுக்கு முற்பட்டு இருந்ததே இல்லை. திராவிட குடும்பத்தைச் சேர்ந்த 73 மொழிகளில் தமிழ், தெலுங்கு, கன்னடம், மலையாளம் ஆகிய நான்கும் இலக்கிய வழக்கும் பேச்சு வழக்கும் உள்ள மொழிகளாகும்; மற்றவையாவும் வெறும் பேச்சு வழக்கில் உள்ள மொழிகள்தான்.

- பழ.நெடுமாறன்

வடவேங்கடம் தென்குமரி தமிழ்கூறும் நல்லுலகத்து என்று தொல்காப்பியம் கூறுவதிலிருந்து கி.மு. 7-ஆம் நூற்றாண்டில் வேங்கடத்திற்கு தெற்கில் தமிழ் தவிர வேறொரு மொழியும் வழங்கவில்லை என்பது தெரிகின்றது எனப் பாவாணர் தமிழ் வரலாறு குறித்து எழுதிய நூலில் குறிப்பிட்டுள்ளார்.

தொல்காப்பியம் கி.மு. 7-ஆம் நூற்றாண்டில் தோன்றியது என தமிழறிஞர்கள் முதலில் கருதினர். ஆனால், கீழடி ஆய்வுக்குப் பிறகு சங்க இலக்கியங்களின் காலம் கி.மு. 6-ஆம் நூற்றாண்டு அல்லது அதற்கு முன்பு என்பது உறுதியாகியுள்ளது. அப்படியானால், தொல்காப்பியத்தின் காலம் அதற்குப் பல நூற்றாண்டுகளுக்கு முன்பாகும். இலக்கியம் கண்டதற்கு இலக்கணம் இயம்பலால் தொல்காப்பிய காலத்திற்கு முன்பே தமிழில் பல இலக்கியங்கள் தோன்றியிருக்கவேண்டும்.

அதைப்போல பல சூத்திரங்களில் என்ப, என்பனார் எனத் தொல்காப்பியர் சுட்டிச் செல்கிறார். அதாவது, அவர் காலத்திற்கு முன்பே தமிழில் பல இலக்கண நூல்கள் இருந்திருக்கின்றன என்பது இவற்றின் மூலம் பெறப்படுகிறது. எனவே, தமிழின் தொன்மை இன்னும் பழைமையானது என்பது உறுதியாகிறது.

கி.பி. 7-ஆம் நூற்றாண்டிலேயே குமரிலபட்டர் என்னும் தெலுங்கு அறிஞர், தெலுங்கைத் தமிழ்மொழியிலிருந்து பிரித்துக் காட்டுவதற்காக 'ஆந்திர திராவிட பாஷா' என்று கூறினார். அதற்குப் பின்னரே கன்னடமும் மலையாளமும் தமிழிலிருந்து பிரிந்தன.

கன்னடமும், களி தெலுங்கும் கவின் மலையாளமும் துளுவும் உன் உதிரத்து உதித்தெழுந்தே ஒன்று பல ஆயிடினும் என்று பேரா. சுந்தரம் பிள்ளை கூறியது பழந்தமிழைப் பொருத்தவரை உயர்வு நவிற்சி அல்ல, உண்மை.

பழந்தமிழுக்கும் இன்றைய தமிழுக்கும் உள்ள வேறுபாடு மிகச் சிறிய அளவினதே ஆகும். இலத்தீன் மொழிக்கும், இத்தாலியம், பிரெஞ்சியம், ஸ்பானியம், போர்த்துகீசியம் முதலிய மொழிகட்கும் இடைப்பட்ட உறவே தமிழுக்கும் தெலுங்கு, கன்னடம், மலையாளம் முதலிய திராவிட மொழிகட்கும் இடைப்பட்ட உறவாகும்.