பன்முகத் திறமையாளர் ராஜேஷ்!

1949-ஆம் ஆண்டில் திருவாரூர் மாவட்டம் மன்னார்குடியில் வில்லியம்ஸ் - லில்லி கிரேஸ் தம்பதியின் மகனாகப் பிறந்த ராஜேஷ், காரைக்குடி அழகப்பா கல்லூரி, பச்சையப்பன் கல்லூரி ஆகிய இடங்களில் படித்தாலும் பட்டப்படிப்பை நிறைவு செய்யவில்லை.

- 

சில காலம் சென்னையில் ஆசிரியராகப் பணிபுரிந்த அவர் 1974-இல் இயக்குநர் கே.பாலசந்தரின், 'அவள் ஒரு தொடர்கதை' படத்தின் மூலம் திரையுலகில் அறிமுகமானார்.

நான்காண்டு இடைவெளிக்குப் பிறகு 'கன்னிப் பருவத்திலே' திரைப்படத்தில் நடிக்கும் வாய்ப்பு கிடைத்தது. அப்படத்தின் நாயகனாக அறிமுகமானவர் ராஜேஷ். அதற்குப் பிறகு பல்வேறு படங்களில் நடித்தார். தமிழ், தெலுங்கு, மலையாளம் உள்பட பல்வேறு மொழிகளில் 150-க்கும் மேற்பட்ட திரைப்படங்களில் அவர் நடித்துள்ளார்.

'அந்த ஏழு நாட்கள்', 'பயணங்கள் முடிவதில்லை', 'சத்யா', 'விருமாண்டி', 'மகாநதி' உள்ளிட்ட பல்வேறு படங்களிலும் அவர் குணசித்திர நடிகராக மிளிர்ந்தார். விஜய் சேதுபதி - கத்ரீனா கைஃப் நடித்த 'மெர்ரி கிறிஸ்துமஸ்' படமே இவர் நடித்த கடைசிப் படம்.

திரைத் துறையைத் தாண்டி... சமூகவலைதளங்களிலும், ஆரோக்கியம் சார்ந்து பல்வேறு நிகழ்ச்சிகளிலும் கலந்துகொண்டு அதிலும் தனக்கென தனி ரசிகர் கூட்டத்தை வைத்திருந்தார். புத்தக வாசிப்பு சார்ந்தும் பேசுவார். ராஜேஷ் ஒரு பன்முகத் திறமையாளர்.