மதுரைக்கு புறப்பட்டார் கள்ளழகர்

வைகை ஆற்றில் எழுந்தருளும் வைபவத்துக்காக

- 

மதுரை, மே 10: சித்திரைத் திருவிழா வையொட்டி, மதுரையில் வைகை ஆற்றில் எழுந்தருளும் வைபவத்துக்காக அழகர் கோயிலிலிருந்து சுந்தரராஜப் பெருமாள் தங்கப் பல்லக்கில் சனிக்கிழமை மாலை புறப்பாடாகினார். ஞாயிற்றுக்கிழமை (மே 11) காலை மதுரை கோ.புதூர் மூன்றுமாவடியில் எதிர்சேவை நடைபெறுகிறது.

அழகர் கோயில் சித்திரைத் திருவிழா கடந்த 8-ஆம் தேதி தொடங்கியது. தொடர்ந்து, தினசரி காலை, மாலை வேளைகளில் கோயில் வளாகத்தில் உள்ள திருக்கல்யாண மண்டபத்தில் தோளுக்கினியான் அலங்காரத்தில் சுந்தரராஜப் பெருமாள் எழுந்தருளினார்.

விழாவின் முக்கிய நிகழ்வான மதுரைக்குப் புறப்பாடாகும் நிகழ்வு சனிக்கிழமை நடைபெற்றது. இதையொட்டி, கண்டாங்கி பட்டு உடுத்தி, கையில் வளரி, தடி ஆகியவற்றுடன் கள்ளர் வேடத்தில் தங்கப் பல்லக்கில் கள்ளழகர் கோலத்தில் கொண்டப்ப நாயக்கர் மண்டபத்தில் சுந்தரராஜப் பெருமாள் எழுந்தருளினார்.