சாதிவாரி கணக்கெடுப்பு

கர்நாடக மாநிலத்தில் சாதிவாரி கணக்கெடுப்பு பணிகள் புதியதாக மீண்டும் தொடங்கி நடந்து வருகிறது. 2015ம் ஆண்டு சித்தராமையா முதல்வராக பதவியேற்ற போது சாதிவாரி கணக்கெடுப்பு ரூ.160 கோடி செலவில் நடத்தப்பட்டது. மேலும் அதன் இறுதி அறிக்கை அரசிடம் சமர்ப்பிக்கப்பட்டது. அறிக்கையை அமல்படுத்த பாஜ, மஜத கட்சிகள் உள்பட காங்கிரஸ் தலைவர்களே சிலர் எதிர்ப்பு தெரிவித்தனர். இதற்கிடையில் ஆட்சி மாற்றம் ஏற்பட்டு பாஜ ஆட்சி அமைந்த பிறகு சாதிவாரி கணக்கெடுப்பு அறிக்கை கிடப்பில் போடப்பட்டது. மீண்டும் சித்தராமையா தலைமையிலான காங்கிரஸ் ஆட்சி 2023ம் ஆண்டு அமைந்தது. அதன் பிறகு சாதிவாரி கணக்கெடுப்பு அறிக்கையை அமல்படுத்த அவர் முயற்சி மேற்கொண்டார். ஆனால் கணக்கெடுப்பு நடத்தி பல ஆண்டுகள் ஆகிவிட்டதால் தற்போது நிறைய மாற்றம் ஏற்பட்டிருக்கும். எனவே அந்த அறிக்கையை கைவிட வேண்டும் என்று பாஜ தலைவர்கள் வலியுறுத்தினர்.

- 

இந்நிலையில் நாடாளுமன்ற எதிர்க்கட்சி தலைவர் ராகுல்காந்தி, பழைய சாதிவாரி கணக்கெடுப்பு அறிக்கையை கைவிட்டு, புதியதாக கணக்கெடுப்பு பணிகளை நடத்த வேண்டும். பணிகளை ஒரு மாதத்தில் முடிக்க வேண்டும் என்று கர்நாடக அரசுக்கு ஆலோசனை வழங்கினார். அவரது ஆலோசனையை ஏற்று காங்கிரஸ் அரசு ரூ.420 கோடி செலவில் சமூக, பொருளாதார, கல்வி கணக்கெடுப்பு என்ற பெயரில் பணியை கடந்த செப்.22ம் தேதி தொடங்கியது. இப்பணியில் அரசு பள்ளி ஆசிரியர்கள் முழு மூச்சாக ஈடுபடுத்தப்பட்டுள்ளனர்.