‘கரூர் துயர சம்பவத்தில் 41 உயிர்களை இழந்திருக்கிறோம்’ சமூக வலைதளங்களில் அவதூறு வதந்திகளை பரப்ப வேண்டாம்

பொறுப்புடன் நடந்து கொள்ள முதல்வர் வேண்டுகோள்

- 

கரூர் துயர சம்பவம் குறித்து சமூக வலைதளங்களில் அவதூறுகளையும், வதந்திகளையும் பரப்ப வேண்டாம் என்று முதல்வர் மு.க.ஸ்டாலின் வேண்டுகோள் விடுத்துள்ளார். இது குறித்து அவர் ஆற்றிய காணொலி உரை:

கரூரில் நடந்தது பெருந்துயரம்; கொடுந்துயரம். இதுவரை நடக்காத துயரம்; இனி, நடக்கக்கூடாத துயரம். மருத்துவமனைக்கு நான் நேரில் சென்று பார்த்த காட்சிகள் இன்னும் என் கண்ணை விட்டு அகலவில்லை. கனத்த மனநிலையிலேயும் துயரத்திலேயும் தான் இன்னும் இருக்கிறேன். செய்தி கிடைத்ததும் மாவட்ட நிர்வாகத்தை முடுக்கிவிட்டு, எல்லா உத்தரவுகளையும் பிறப்பித்த பின்னாலும், என்னால் வீட்டில் இருக்க முடியவில்லை; உடனே அன்றைக்கு இரவே கரூருக்கு போனேன்.