குப்பை, தண்ணீரை பிரிக்கும் இயந்திரம்

மழைக்காலம் ... சாலையோர குப்பையை அடித்துக் கொண்டு மழை நீர், ஒரத்துக் கால்வாயை நோக்கியே செல்கிறது. குப்பையுடன், மழைநீரும் சேர்ந்து ரோட்டோரக் கால்வாயில் விழுந்து அடைத்துக் கொள்ள, தண்ணீர் வெளியேற வழியின்றி சாலை முழுக்க நிரம்பி வழியும். இதனால் போக்குவரத்து நெரிசலுடன், விபத்துகளும், தேங்கும் கழிவுகள் தரும் நோய்த் தொற்றுகளும் என பாதிப்புகளின் தீவிரம் அதிகம். இந்நாட்களில் பொதுமக்களுடன், சீரமைக்க முடியாமல் உள்ளாட்சி நிர்வாகத்தினரும் பெரும் சிரமத்திற்கு ஆளாகின்றனர். இந்த துன்பத்தை துடைத்தெறிந்து, எளிதாக கால்வாயைத் தேடி வரும் கழிவுகளின் குப்பையை தனியாகப் பிரித்து, தடையின்றி தண்ணீரை கால்வாயில் ஓட விட்டு 'மந்திரம்' செய்கிற, ஒரு மகத்தான கண்டுபிடிப்பை மதுரை கோரிப்பாளையம் சாய்ராம் வித்யாலயா பள்ளி மாணவர்கள் கண்டுபிடித்து அசத்தியுள்ளனர்.

- 

தண்ணீருடன் வரும் குப்பைகளை தானாக பிரிக்கும் இந்த, குப்பை - தண்ணீர் பிரிப்பு இயந்திரத்தை வடிவமைத்துள்ள பள்ளியின் 9ம் வகுப்பு மாணவர்கள் சையது ஆகில் தாரிக், அர்கான், செந்தமிழ் நிலவன் ஆகியோர் கூறியதாவது:

மதுரை உள்ளிட்ட நகரங்களில் சாலைகளை மேலும் விரிவுபடுத்த முடியாத நிலையே இருக்கிறது. எனவே, மழைக்காலங்களில் தேங்கும் தண்ணீரை வெளியேற்ற சாலையோர கால்வாய் வடிகால்களே உதவுகின்றன. ரோட்டில் வீசப்படும் குப்பைகள் மழைநாட்களில் தண்ணீருடன் கலந்து சாலையோர கால்வாயை நோக்கிச் செல்கின்றன. தண்ணீருடன் குப்பையும் கலந்து வந்து, சாலையோர கால்வாயில் வெளியேற முடியாமல் அடைத்துக் கொண்டு, சாலை முழுக்க தேங்குகிறது. இதில் அத்தனை தரப்பு மக்களும் பெரும் பாதிப்பிற்கு ஆளாகின்றனர். இந்த துன்பத்தை பலமுறை அனுபவித்த நிலையில்தான் இதற்கான தீர்வு காணும் ஆசை பிறந்தது. மாணவர்கள் மூவரும் சேர்ந்து பள்ளி முதல்வர் லெட்சுமி, வழிகாட்டி ஆசிரியர் அப்துல் ரஷாக் மற்றும் அறிவியல் ஆசிரியர்கள் உள்ளிட்டோரின் வழிகாட்டுதலுடன் ஓர் இயந்திரத்தை வடிவமைத்துள்ளோம். மழைக்காலத்தில் குழாய்களை அடைக்கும் குப்பைகளை பிரித்து தண்ணீரை வெளியேற்றும் இந்த இயந்திரத்தை ரூ.2 ஆயிரம் செலவிற்குள் எளிமையாகச் செய்துள்ளோம்.

இரு பகுதி கொண்ட பாக்சின் ஒரு பாதியில் பேட்டரியில் இயங்கும் மோட்டார் பொருத்தப்பட்டிருக்கும். டூவீலருக்கான இந்த மோட்டார், குப்பையுடன் கலந்து வரும் நீரோட்டம் எவ்வளவு இருந்தாலும் அதிவேகத்தில் சமாளிக்கும் திறன்மிக்கது.