கன்னியாகுமரி - ராமநாதபுரம் இடையிலான கிழக்கு கடற்கரை ரயில்வே திட்டம் அறிவிக்கப்படுமா?

தமிழகத்தில் 3 ஆயிரத்து 852 கி.மீ. தூரத்துக்கு ரயில்வே வழித்தடங்கள் உள்ளன. தமிழக மக்கள் தொகை மற்றும் பரப்பளவை ஒப்பிடும் போது இன்னும் கூடுதலாக 4 ஆயிரத்து 131 கி.மீ. இருப்பு பாதை வழித்தடங்கள் தேவை ஆகும். மக்கள்தொகை அடர்த்தியைப் போன்று ரயில் அடர்த்தியையும் கணக்கிட்டு வருகின்றார்கள். தமிழகம் அகில இந்திய அளவில் வளர்ச்சியில் இரண்டாவது பெரிய மாநிலம் ஆகும். ரயில் அடர்த்தி என்பது 1000 சதுர கி.மீ பரப்பளவில் எவ்வளவு ரயில்வே இருப்பு பாதைகள் உள்ளன என்பதை கணக்கிடுவது ஆகும்.

- 

தமிழ்நாட்டில் தற்போது 32.07 சதவீத ரயில் அடர்த்தி உள்ளது. இதை படிப்படியாக 50 சதவீதம் வரை அதிகரிக்க வேண்டும். உத்திரபிரதேசம், பஞ்சாப், ஹரியானா, பீகார், மேற்கு வங்காளம் ஆகிய மாநிலங்கள் தமிழகத்தை விட முன்னணியில் உள்ளன. தமிழகம் ஒன்றிய அரசுக்கு செலுத்தும் வரி வருவாயில் இரண்டாம் இடத்தில் உள்ளது. வரிவருவாயில் இரண்டாம் இடத்தில் உள்ளதைப் போன்று ரயில் அடர்த்தியிலும் இரண்டாம் இடத்துக்கு வர வேண்டும்.

இதற்கு குறைந்தபட்சம் வருடத்துக்கு ஒரு புதிய இருப்பு பாதை திட்டத்தையாவது செயல்படுத்த அனுமதி அளிக்க வேண்டும். இவ்வாறு செய்தால் மட்டுமே தமிழகம் வளர்ச்சிப் பாதையில் செல்லும். மதுரைக்கு தெற்கே உள்ள மாவட்டங்களில் விருதுநகர் - மானாமதுரை, திருநெல்வேலி-திருவனந்தபுரம் பாதை தவிர மற்ற அனைத்து மாவட்டங்களில் உள்ள ரயில் பாதைகளும் ஆங்கிலேயர் காலத்திலேயே அமைக்கப்பட்டவை ஆகும்.