இனிக்காத பயணம்

இந்தியாவில் அதிக லாபம் ஈட்டித்தரும் பயணப் போக்குவரத்துகளில் ரயில் முக்கிய இடம் வகிக்கிறது. இந்தியாவை பொறுத்தவரை சுமார் 13,000 ரயில்கள் இயக்கப்படுகின்றன. மாறி வரும் நாகரீக உலகில் மிக குறைந்த வயதிலேயே நீரிழிவு உட்பட பலவிதமான நோய் உபாதைகளுக்கு ஆளாகிறோம். எனவே, வயது வித்தியாசமின்றி அனைவரும் விரும்பி பயணிக்கும் தேர்வாக ரயில் பயணம் இருக்கிறது. இந்த சூழலில் ரயில் கட்டணத்தை இன்று முதல் உயர்த்த ஒன்றிய அரசு முடிவு செய்துள்ளது. இது ரயில் பயணிகளை அதிர்ச்சிக்குள்ளாக்கியுள்ளது.

- 

ஏற்கனவே ஒன்றிய பாஜ அரசு கடந்த 2020ம் ஆண்டு ரயில் கட்டணத்தை உயர்த்தியிருந்தது. அப்போது சாதாரண முன்பதிவில்லாத பெட்டியில் பயணிக்க கிமீக்கு 1 பைசா, எக்ஸ்பிரஸில் முன்பதிவில்லாத கட்டணத்தில் கிமீக்கு 2 பைசா, ஸ்லீப்பர் வகுப்பில் பயணிக்க கிமீக்கு 2 பைசா, ஏசி பெட்டியில் பயணிக்க 4 பைசா என விலை உயர்த்தி அறிவித்தது. இதற்கு கடும் எதிர்ப்பலை கிளம்பியும், வழக்கம்போல ஒன்றிய அரசு கண்டுகொள்ளவில்லை. தற்போது மீண்டும் கட்டண உயர்வை அறிவித்துள்ளது. மேலும், இன்று முதல் இ-ஆதார் அடிப்படையில் மட்டுமே தட்கல் டிக்கெட் முன்பதிவு செய்ய முடியும். இனிமேல், தட்கல் டிக்கெட் முன்பதிவு செய்யும் பயணிகள் தங்கள் ஆதார் விவரங்களை கண்டிப்பாக வழங்க வேண்டுமென்றும் அதிரடியாக கூறியுள்ளது.