சமூக வலைத்தளங்கள் மூலம் விதவிதமாக அரங்கேறும் மோசடிகள்

சமூக வலைத்தளங்களில் சலுகை விலையில் மளிகை பொருட்கள் டோர் டெலிவரி செய்வதாக மோசடி நடைபெற்று வருவதால் பொதுமக்கள் எச்சரிக்கையுடன் இருக்க சைபர் க்ரைம் போலீசார் கேட்டுக்கொண்டு உள்ளனர்.

- 

கடந்த 10 ஆண்டுகளாக ஸ்மார்ட் போன்கள் வந்த பின்னர், இணையதளம் மூலம் பல்வேறு மோசடிகள் நடை பெற்று வருகின்றன. வங்கியில் இருந்து பேசுகிறோம், ஏடிஎம் பின் நம்பரை மாற்ற வேண்டும், கணக்கு விபரங்களை சொல்லுங்கள் என்பதில் தொடங்கி வீட்டில் இருந்தே வேலை செய்து சம்ப திக்கலாம், ஆன்லைனில் ஆண் மற்றும் பெண் நண்பர்களுடன் நள்ளிரவிலும் அரட்டை அடிக்கலாம், பிரபல நிறுவனங்கள் மற்றும் அரசியல் கட்சி தலைவர்கள் பெயரில் போன் பே போன்ற ஆப்கள் மூலம் பணத்தை சுருட்டுவது, உங்கள் மொபைல் எண்ணிற்கு பரிசு விழுந்துள்ளது, எனவே அதற்கான வரியை அனுப்பினால், பரிசு கிடைக்கும் என பண ஆசை காட்டி மோசடிகள் நடைபெற்று வருகின்றன.

இதனை தவிர முகநூலில் ஆண்களாக இருந்தாலும் சரி பெண்களாக இருந்தாலும் சரி, அவர்களுக்கு நட்பிற்கான கோரிக்கையை அனுப்பி, நட்பு ஏற்றுக் கொண்டதும், மேசேஞ்சர் அல்லது இ மெயிலில் நட்பு பாராட்டி பின்னர், நட்பை ஏற்றுக்கொண்டவர்களின் சபலத்தை பயன்படுத்தி, காதலிப்பதாக கூறி, சில நாட்கள் சாட் செய்த பின்னர், பரிசு பொருள் அனுப்பி வைக்கிறேன். அதற்கு கொஞ்சம் பணம் தேவைப்படுகிறது என கொஞ்சும் குரலில் பேசி, ஆளை பொறுத்து ஆயிரம் முதல் லட்சம் வரை சுருட்டி விடுகின்றனர். சிலர், ஆபாச லிங்க் அல்லது வங்கி கணக்கில் பணம் கிரெடிட் ஆவது போல் லிங்க் அனுப்பி, அதனை திறந்தால், ஒட்டுமொத்த போனுமே ஹேக் செய்யப்பட்டு, பணம் மொத்தமாக வங்கிகணக்கில் இருந்து சுருட்டப்படுவதும் தொடர் கதையாகி வருகிறது.