சுற்றுச்சூழலுக்கு பாதிப்பில்லா டெரகோட்டா ஏர்கூலர்

புவி வெப்பமடைதல் காரணமாக இந்தியாவில் 2010க்கு பிறகு ஏர் கண்டிஷனர்களின் (ஏசி) விற்பனை மூன்று மடங்கு அதிகரித்துள்ளது. இதனால் 2019ல் இருந்து மின்நுகர்வு 21 சதவீதமாக உயர்ந்துள்ளது. குறிப்பாக, ஏர் கண்டிஷனருக்காக மட்டும் நாட்டின் மின்தேவையில் 10 சதவீதம் பயன்படுத்தப்படுகிறது. மேலும், ஏர்கண்டிஷனர்களில் பயன்படுத்தப்படும் குளோரோபுளோரோ கார்பன் மற்றும் ஹைட்ரோ குளோரோ கார்பன் என்ற வாயு ஓசோனில் பெரும் பாதிப்பை ஏற்படுத்துகிறது.

- 

இதனால் ஒருபுறம் வெப்பம் அதிகரிப்பதுடன், மற்றொருபுறம் சூரிய ஒளி நேராக நம் மீது படுவதால் தோல் புற்றுநோய், கண்புரை பாதிப்பு போன்ற பல்வேறு பிரச்னைகள் ஏற்படுகிறது. மேலும் சில கடல்வாழ் உயிரினங்கள் மற்றும் தாவரங்களுக்கும் பாதிப்பு ஏற்படுத்துகிறது. எனவே, சுற்றுச்சூழலுக்கும், உடல் நலத்துக்கும் பாதிப்பு ஏற்படாத வகையில் குறைந்த செலவு மற்றும் மின்சாரத்தில் அதிக குளிர்ச்சியான காற்றை தரக்கூடிய டெரகோட்டா ஏர் கூலரை புதுச்சேரியை சேர்ந்த அரசு பள்ளி மாணவன் உருவாக்கி சாதனை படைத்துள்ளார்.

புதுச்சேரி மாநிலம் வில்லியனூரில் உள்ள விவேகானந்தா அரசு ஆண்கள் மேல்நிலைப்பள்ளியில் 10ம் வகுப்பு படிக்கும் மாணவர் முகமுது தாஜ்தீன் (16). இவர் அறிவியல் ஆசிரியை வரலட்சுமி (எ) மாலதி வழிகாட்டுதலின் பேரில் டெரகோட்டா ஏர் கூலரை உருவாக்கி புதுச்சேரி மண்டல அளவிலான அறிவியல் கண்காட்சியில் காட்சிக்கு வைத்திருந்தார். இது அனைவரது கவனத்தையும் ஈர்த்ததுடன் மண்டல அளவில் முதல் பரிசும் பெற்றது. தொடர்ந்து, மாநில அளவிலான அறிவியல் கண்காட்சியில் பங்கேற்றதில், சிறந்த படைப்புகளுள் ஒன்றாகவும் தேர்வானது.

இதன் மூலம் புதுச்சேரியில் நடந்த தென்னிந்திய அளவிலான அறிவியல் கண்காட்சியிலும் பங்கேற்கும் வாய்ப்பு கிடைத்தது. இக்கண்காட்சியில் மாணவர் முகமது தாஜ்தீன் உருவாக்கிய டெரகோட்டா ஏர் கூலருக்கு தென்னிந்திய அளவில் முதல் பரிசு, இன்ஜினியரிங் பிரிவில் சிறந்த படைப்புக்கான விருது, புதுச்சேரியிலேயே சிறந்த அறிவியல் படைப்பு என்ற விருது மற்றும் ரூ.7 ஆயிரம் ரொக்கம் என பல பரிசுகள் கிடைத்தது.