மனநோயாளி கணவன் மருகும் மனைவி!

அந்தரங்க அட்வைஸ்

- 

அன்புள்ள டாக்டர், நான் இருபத்தெட்டு வயது குடும்பத்தலைவி. எங்களுக்குத் திருமணமாகி மூன்று வருடங்களாகிறது. நாங்கள் இருவருமே மென்பொறியாளர்கள். நானும் என் கணவரும் ஒரே நிறுவனத்தில் வேலை செய்த போது காதலித்து வீட்டார் சம்மதத்துடன் திருமணம் செய்துகொண்டோம். இருவரும் ஒரே சமூகம், அந்தஸ்திலும் பெரிய வித்தியாசம் இல்லை என்பதால் இரு இல்லத்திலுமே எங்கள் காதலுக்குப் பச்சை கொடி காட்டினார்கள். நாங்கள் இருவரும் மிகுந்த காதலோடு மணந்துகொண்டோம். தேன் நிலவுக்கு ஐரோப்பாவுக்குச் சென்றோம். மிக்க மகிழ்ச்சியாகவே எங்கள் நாட்கள் சென்றன.

கடந்த சில மாதங்களாக எங்கள் இல்லறத்தில் புயல்வீசத் தொடங்கியிருக்கிறது. அதற்குக் காரணம் என் கணவரின் தாழ்வு மனப்பான்மை. இருவரும் பழகத் தொடங்கிய காலத்தில் ஒரே நிறுவனத்தில் ஒரே டீமில் தான் வேலை செய்தோம். திருமணமான புதிதில் எனக்கு வேறொரு நிறுவனத்தில் அதைவிட கொஞ்சம் அதிகமான சம்பளத்தில் வேலை கிடைத்தது. என் கணவரும் அதிக சம்பளம் நல்லதுதான், நீ அதில் சேர்ந்துகொள் என்றார். நானும் சேர்ந்துகொண்டேன். கொஞ்ச நாளில் அங்கேயே எனக்கு மேலே வேலை செய்த அதிகாரி வேறொரு நிறுவனத்துக்குச் செல்வதால் அனுபவம் எனக்கு அதிகம் என்று என்னை எங்கள் டீம் ஹெட் ஆக்கினார்கள். அதனால் என் சம்பளம் மேலும் அதிகமானது.

இப்போது என் கணவரின் சம்பளத்தை விடவும் எனது சம்பளம் கண்ணை உறுத்தும் அளவுக்குச் சற்று அதிகரித்துவிட்டது. இது என் கணவரை உளவியல்ரீதியாகப் பாதித்திருக்கும் என நினைக்கிறேன். என்னிடம் அவர் இதைச் சொல்லவில்லை என்றாலும் அவரின் நடவடிக்கைகளில் அதை உணர்ந்தேன். நான் வேண்டுமானால் வேலையை விட்டுவிடவா என்று கேட்டுப்பார்த்தேன். ஏகப்பட்ட கமிட்மென்ட்ஸ் இருக்கிறது. வேலை இல்லாவிடில் சிரமம் நீ விடாதே என்றார். நான் டீம் ஹெட் என்பதால் சில நாட்களில் இரவு வரை வேலை செய்ய வேண்டியது இருக்கும். நானும் வேலையை முடித்துவிட்டு, கேபில் வீட்டுக்கு வருவேன். என் கணவர் கொஞ்சம் முன்பே வந்துவிடுவார் என்பதால் எனக்கும் சேர்த்து எதையாவது சமைத்திருப்பார். இருவரும் உண்டுவிட்டுப் படுத்துவிடுவோம். இப்படி சில நாட்கள் போயின.