MEISIE OP ERGSTE MANIER GE-VIOLATE

Sewejarige glo wreed deur drie seuns in skool se toilet in Fisantekraal gemolesteer

- CHRISLYNN SIAS-LOUW

SLAGOFFER: 'n Sewejarige meisie is vir die res van haar lewe geskend nadat sy glo erg by die skool gemolesteer is. FOTO TER ILLUSTRASIE

'N KIND wat skree en huil van pyn en 'n ma in trane en ongeloof omdat ander kinders haar lieflingkind so seergemaak en van haar onskuld beroof het.

Dit is die hartseer-verhaal van 'n ma en haar sewejarige dogtertjie van Fisantekraal wat na bewering erg molesteer is by die Primêre Skool Fisantekraal.

Daar is glo twee weke gelede, op 7 November, toiletpapier in die meisietjie se vagina opgedruk.

Dié toiletpapier het 'n infeksie veroorsaak en die kind is nou op haar tweede ronde antibiotikum om die infeksie uit haar liggaam, en veral haar lewer, wat beskadig is, te werk.

Wanneer jy met die kind se mamma gesels, skeur die sewejarige se krete van pyn op die agtergrond deur jou en kan jy nie anders as om te wonder hoekom kinders mekaar op dié manier sou seermaak nie.

Die mamma vertel haar kind het op 7 November uit die skool gekom en reguit na haar kamer gegaan. Dit was ongewoon, want dié sewejarige is nie 'n kind wat in die kamer lê nie.

“Ek het haar gelos, want ek het gedink sy het seker heeldag by die skool in die hitte gespeel. Die aand toe lê die kind steeds en toe ek aan haar vat, was sy vuurwarm. Ons het haar Calpol gegee vir die koors.”