WREDE END VIR VEGTER

DIE Middelpos-gemeenskap in die Noord-Kaap sukkel om tot verhaal te kom ná die dood van een van dié dorpie se geliefde LGBTQIA-aktiviste en raadslede bekend as Hallee Laban.

- CHRISLYNN SIAS-LOUW

Soveel so dat dit 'n gesukkel was om mense aan die praat te kry oor Laban se beweerde "wrede" einde.

Volgens gerugte wat tans die ronde doen, is Laban op Vrydag 5 September met 'n ysterpaal aangerand.

Sy is toe in die hospitaal opgeneem en is Saterdag ontslaan. Gedurende die loop van Saterdag terwyl sy gelê en slaap het, het dieselfde verdagte wat haar aangerand het, glo haar wendyhuis aan die brand gesteek.

Laban is na bewering so erg verbrand dat haar familie wag vir DNA-uitslae om haar identiteit vas te stel en die forensiese ondersoek om tot 'n einde te kom voordat hulle begrafnisreëlings kan tref.

Nie net was Laban 'n raadslid in die streek nie, sy was ook die voorsitter van die polisiëringsforum, kampvegter in die gemeenskap en het haar daarvoor beywer om onder die jeug te werk om hulle te upskill.