రాయలసీమకు హంద్రినీవా జలాలు

• ఈ నెల 17న నీటిని విడుదల చేయనున్న చంద్రబాబు • హంద్రీనీవా ఫేజ్-1 కాలువల సామర్థ్యం పెంపు • శరవేగంగా పనులు పూర్తి • 100 రోజుల్లోనే కాలువ విస్తరణ

- 

అమరావతి - ఆంధ్రనాడు, జూలై 15 హంద్రీనీవా ఫేజ్-1 కాలువల సామర్థ్యం పెంపుతో రాయల సీమలో తాగు, సాగునీటి కష్టాలు తీరనున్నాయి. కూటమి ప్రభుత్వం వంద రోజుల్లోనే ఈ ప్రాజెక్టు పనులను పూర్తి చేసి చరిత్ర సృష్టించింది. కూటమి ప్రభుత్వం తీసుకున్న వేగవంతమైన నిర్ణయాలు, చూపిన చొరవ ఫలితంగా రాయలసీమకు జలసిరులు అందనున్నాయి. హంద్రీనీవా ఫేజ్-1 కాలువల విస్తరణ పనులు విజయవంతంగా పూర్తి కావడంతో సీమ జిల్లాలు సస్యశ్యామలం అయ్యేందుకు మార్గం సుగమం అయింది. ముఖ్యమంత్రి చంద్రబాబు ఈ నెల 17వ తేదీన నంద్యాల జిల్లా నందికొట్కూరు మండలం మల్యాల పంపింగ్ స్టేషన్ వద్ద విస్తరణ పూర్తైన హంద్రీనీవా కాలువకు నీటిని విడుదల చేయనున్నారు. ప్రభుత్వం ప్రకటించిన విధంగా వంద రోజుల్లోనే ఈ కాలువ విస్తరణ పనుల లక్ష్యాన్ని పూర్తి చేసింది.