நான் இருக்கும்வரை தமிழ்நாட்டில் பா.ஜ.க. நோ! மாநாட்டில் ஸ்டாலின் ஆவேசம்!

திருச்சி -சென்னை தேசிய நெடுஞ்சாலையிலுள்ள சிறுகனூர் பகுதியில் சுமார் 400 ஏக்கர் பரப்பளவில் பிரமாண்ட மேடையில் மார்ச் 9ஆம் தேதி, திங்களன்று, தி.மு.க. தலைவரும் முதல்வருமான மு.க.ஸ்டாலின் 110 அடி உயரக் கொடிக்கம்பத்தில் கட்சிக்கொடியை ஏற்றி, 'ஸ்டாலின் தொடரட்டும், தமிழ்நாடு வெல்லட்டும்' என்ற கருப்பொருளில் தி.மு.க.வின் 12வது மாநில மாநாட்டைத் தொடங்கிவைத்தார்.

- 

மாநாட்டுப் பந்தலில் 3 லட்சம் பேர் அமரும் வகையில் நாற்காலிகள் போடப்பட்டிருந்தன. பந்தலைச் சுற்றி சுமார் 2 லட்சம் பேர் நின்றுகொண்டே மாநாட்டைப் பார்க்கும் வகையில் பிரம்மாண்டமான இடவசதி செய்யப்பட்டிருந்தது.

மாநாட்டிற்கு வரும் தொண்டர்களுக்காகப் பசி போக்கும் வகையில் பிரமாண்ட சமையற்கூடங்கள், சுத்திகரிக்கப்பட்ட குடிநீர் வழங்கு நிலையங்கள், மொபைல் சார்ஜிங் பாயின்டுகள், செல்ஃபி பாயின்ட், ஓய்வுப் பகுதி, அவசர சிகிச்சை மையம், தீயணைப்பு வாகனங்கள், போதுமான கழிவறை வசதிகளும் செய்யப்பட்டிருந்தது.

தொண்டர்களை மு.க.ஸ்டாலின் நேரடியாகச் சந்திக்கும் வகையில் நீண்ட தூரத்துக்கு சிறப்பு நடைபாதை (Ramp) அமைக்கப்பட்டிருந்தது. அதில் நடந்துசென்று, லட்சக்கணக்கில் கூடியிருந்த தொண்டர்களைப் பார்த்து மு.க.ஸ்டாலின் உற்சாகமாகக் கையசைத்தார்.

திருச்சி தி.மு.க. மாநில மாநாட்டில் முதலமைச்சர் மு.க.ஸ்டாலின் உரையாற்றியபோது “திருச்சி மண்ணில் அலைகடலெனத் திரண்டிருக்கும் என் உயிர்நிகர் உடன்பிறப்புகளே! நம்முடைய நேருவிடம் மாநாடு என்று சொல்லிவிட்டாலே போதும், அவருக்குள் புது எனர்ஜி வந்துவிடும்! நாம் நினைப்பதைவிட எப்போதும் பிரமாண்டமாக நடத்துவதுதான் நேருவின் ஸ்டைல். நான் எப்போதும் சொல்வது... மாநாடு என்றால் நேரு... நேரு என்றால் மாநாடு!