துணை ஜனாதிபதி சி.பி.ஆர். தேர்வு! அரசியல் கணக்கு!

சி.பி.ராதாகிருஷ்ணன் குடியரசு துணைத் தலைவராக தேர்ந்தெடுக்கப்பட இருப்பது தமிழக அரசியலில் பல மாற்றங்களை உருவாக்கும் என எதிர்பார்க்கப்படுகிறது.

- -தாமோதரன் பிரகாஷ்

அவர் குடியரசு துணைத் தலைவராக தேர்ந்தெடுக்கப்படுவதற்கு முன்பு தமிழக முதல்வர் மு.க.ஸ்டாலினை தொடர்பு கொண்டு பேசினார். வாஜ்பாய் அமைச்சரவையில் இடம்பெற்ற தி.மு.க., ஜெயலலிதா வாஜ்பாயை கவிழ்த்ததை எதிர்த்து பா.ஜ.க.வுடன் உறவு கொண்டது. அந்த சூழலில் மறைந்த இல.கணேசனும், சி.பி.ராதாகிருஷ்ணனும் தி.மு.க.வினருடன் நெருங்கிப் பழகினார்கள். இல.கணேசன் கலைஞருடன் நெருங்கிப் பழகிய நேரத்தில் சி.பி.ராதாகிருஷ்ணன் ஸ்டாலினுடன் நெருக்கமான நட்பு பாராட்டினார். ஆண்டுக்கணக்கில் தொடரும் அந்த நட்பின் அடிப்படையில் சி.பி.ராதாகிருஷ்ணன், தான் குடியரசு துணைத் தலைவருக்கான தேர்தலில் நிற்பது குறித்து, தமிழக முதல்வரிடம் பேசினார். எனது பெயர், ஆரீப் முகமதுகானை விட முன்னிலையில் இருக்கின்றது. என்னை குடியரசு துணைத் தலைவர் தேர்தல் வேட்பாளராக அறிவிக்கும் பட்சத்தில் தி.மு.க. எனக்கு ஆதரவு தர வேண்டும் எனக் கோரிக்கை வைத்தார். அதற்கு பதிலளித்த முதல்வர் ஸ்டாலின், ‘இண்டியா கூட்டணி குடியரசு துணைத் தலைவர் தேர்தலில் என்ன முடிவெடுக்கிறது என பார்ப்போம். இண்டியா கூட்டணியின் முடிவைப் பொறுத்து உங்கள் கோரிக்கையை நான் பரிசீலிக்கிறேன்' என ராதாகிருஷ்ணனுக்கு பாசிட்டிவும் நெகட்டிவும் இல்லாத பதிலை சொன்னார். தி.மு.க. தலைவரிடம் நேரடியாகப் பேசும் அளவிற்கு உறவு வைத்துள்ள ஒரே பா.ஜ.க. தலைவர் சி.பி.ராதாகிருஷ்ணன்.