இந்துவா? கிறிஸ்தவரா? பல்டியடித்த ஜக்கி!

“ஈஷா மைய ஜக்கி வாசுதேவ் மீது இந்தியாவில் எவ்வளவு மோசடி மற்றும் பாலியல் புகார்கள் இருக்கின்றதோ, அதற்கு மேலாக அதிகளவு புகார்கள் அமெரிக்காவில் இருக்கின்றது” என முன்னரே இதுகுறித்து 'நக்கீரன்’ குறிப்பிட்டிருந்தது.

- -நாகேந்திரன்

இந்த நிலையில், ஜக்கி வாசுதேவ் மீதான பாலியல் துஷ்பிரயோகங்கள், போதை வஸ்துகள் பயன்பாட்டுக் குற்றங்கள், மோசடி பணப் பரிவர்த்தனைகள், உரிமம் இல்லாத துப்பாக்கிகள் உள்ளிட்ட குற்றச்சாட்டுகள் குறித்து அமெரிக்காவின் வாரன் கவுண்டி போலீஸார் விசாரித்து வந்தனர். புகாரில் ஆஜராகக்கூறி மாவட்ட ஆணையர் குழுமம் சம்மன் அனுப்பிய நிலையில், 'இந்துவாக இருந்த ஜக்கி வாசுதேவ் கிறிஸ்தவனாக மாறியது'தான் பல சர்ச்சைகளை உருவாக்கியுள்ளது.

சம்மனை வாங்கியதுமே மிரண்டுபோன ஜக்கி வாசுதேவ், 'வாரன் கவுண்டி மாவட்ட ஆணையர் குழுவினால் கேட்கப்படும் கேள்விகளால் பக்தர்கள் மத்தியில் மரியாதை என்பதே துளியும் இருக்காது. ஆகையால் நாம் ஆஜராகக்கூடாது' என்று முடிவெடுத்து, டென்னஸி மாநிலத்திலுள்ள ஈஷாவில் வசிக்கும், அமெரிக்காவிலுள்ள ஈஷா அறக்கட்டளையின் தலைவர் டாக்டர் உஷா தோஷி, அமெரிக்க ஈஷா அறக்கட்டளையின் பொருளாளர் செந்தில்குமார் கன்னியப்பன் உள்ளிட்ட நபர்களை தன்னுடைய பொறுப்பாளர்களாக அனுப்பிவைத்தார் ஜக்கி வாசுதேவ்.

அங்கு ஈஷாவின் வரி ஏய்ப்பு, பாலியல் துஷ்பிரயோகம் மற்றும் டென்னஸி மெக்மின் வில்லியில் அமைந்துள்ள ஈஷா அறக்கட்டளையில், கம்யூனில் இருந்த ஜேக்கப் மாதாவின் மரணம் உள்ளிட்ட குற்றச்சாட்டுகள் உட்பட ஈஷா அறக்கட்டளையின் செயல்பாடுகள் குறித்து அவர்களிடம் கடுமையாக விசாரிக்கப்பட்டது.