மேயர் Vs கமிஷனர்

தமிழக முதல்வரின் கடலூர் வருகையையடுத்து, மஞ்சக்குப்பம் மைதானத்தில் வணிக வளாக கட்டுமான பணிக்கு அடிக்கல் நாட்டுவிழா மார்ச் 10-ஆம் தேதி நடைபெற்றது.

- எஸ்.பி.எஸ்.

இந்த நிகழ்ச்சியில் கலந்துகொள்ள மேயர் சுந்தரி ராஜா, துணைமேயர் தாமரைச்செல்வன், மண்டல தலைவர் பிரசன்னா, கவுன்சிலர்கள் சுபாஷினி ராஜா ஆகியோர் வருகைதந்தனர். கமிஷனர் அனு மற்றும் அதிகாரிகள் தரப்பில் யாரும் வரவில்லை. இதனால் கோபமடைந்த மேயர் சுந்தரி ராஜா, "கட்டடப் பணிக்கு அடிக்கல் நாட்டும் நிகழ்ச்சி நடத்தவேண்டும் என்று அதிகாரிகள் தெரிவித்ததின் பேரில் தான் நான் இங்கு வந்தேன். ஆனால் யாரும் வரவில்லை" என்றார்.

நிகழ்ச்சி முடியும் தறுவாயில் மாநகராட்சி உதவிச் செயற்பொறியாளர் பாரதி மற்றும் சில அலுவலர்கள் அவசர, அவசரமாக ஓடிவந்து நிகழ்ச்சியில் கலந்துகொண்டனர். இதைக் கண்டு கோபமடைந்த மேயர், "மாநகராட்சி திட்டப் பணிகளை தொடங்கிவைக்க நேரம் ஒதுக்கி, என்னை இங்கு வரச் சொல்லிவிட்டு நீங்கள் யாரும் வரவில்லையே ஏன்?" என்று கேள்வி எழுப்பியதோடு, "கடந்த சில நிகழ்ச்சிகளாக இதே போல்தான் நடந்துகொள்கிறீர்கள். பெண் என்பதால் மதிக்காமல், நான் கலந்துகொள்ளும் நிகழ்ச்சிகளைப் புறக்கணிக்கிறீர்களா?" என்று ஆவேசக் குரலில் பேசினார்.

கடலூர் மாநகராட்சியில் அடிக்கடி முட்டல் - மோதல்கள் நடக்கின்றன. என்னதான் நடக்கிறது மாநகராட்சியில் என்பது குறித்து கவுன்சிலர்களிடம் விசாரித்தோம்.