એમણે વહાવી દૂધ-ઘીની નદી

સાસુ-વહુના સંબંધોની સાર્વત્રિક છાપ સંઘર્ષની છે, છતાં અનેક કિસ્સામાં ઘરની આ બે મહિલા વચ્ચે ભારે મનમેળ અપવાદરૂપ નથી. પોરબંદર પાસેના રાણાવાવ ગામમાં એક સાસુ-વહુ સાથે મળીને સરસ મજાની ગૌશાળાનું સફળ સંચાલન કરીને કમાણી કરી રહ્યાં છે.

- દેવેન્દ્ર જાની

ગામડાંઓમાં મહિલાઓ પશુઓને સાચવવાનું, વાસીદાં વાળવાનું, ગાય-ભેંસ દોહવાનું તથા ડેરીએ દૂધ પહોંચાડવું જેવાં કામ કરે એમાં અચરજ નથી. જો કે આ કામમાં કોઈ દિવસ રજા આવતી નથી એટલે યુવાપેઢીને એ ગમતું નથી. આ ટ્રેન્ડને ઊલટાવવ સાહસ સૌરાષ્ટ્રની એક મહિલાએ કર્યું છે.

રાજકોટથી પોરબંદર જતાં રસ્તામાં રાણા ગામ આવે. આ ગામ આમ તો મહેર સમા પરંપરા અને સંસ્કૃતિ માટે આખા પંથકમાં વિખ્યાત છે, પરંતુ થોડા મહિનાથી રાણાવાવ સાસુ-વહુની એક જોડીને કારણે જાણીતું બન્યું છે. સાસુ-વહુની ચર્ચા નીકળે એટલે સામાન્ય રીતે અંદરોઅંદરના ઝઘડાની કોઈ વાત હશે એવું જ માની લેવામાં આવે. જાણે આ બન્ને પાત્ર કાયમ એકબીજાની નિંદા જ કરતાં હોય. કુટુંબ કે સમાજમાં પણ આ સંબંધની એક વિરોધાભાસની ઓળખ ઊભી થઈ છે, પરંતુ ખારા રણમાં જેમ મીઠી વીરડી હોય એમ સૌરાષ્ટ્રના રાણાવાવ ગામમાં સાસુ-વહુના સંબંધને એક નવી ઊંચાઈ આપતું ઉત્તમ ઉદાહરણ સામે આવ્યું છે.

અહીં એક સાસુમા અને એમની પુત્રવધૂ સાથે મળીને ગૌશાળાના સંચાલન થકી કમાણી કરીને ઘરને આર્થિક ટેકો આપી રહ્યાં છે.

એક બાજુ ભણતર, યુવાનીનો થનગનાટ અને નાનપણનો ગૌપાલનનો અનુભવ... તો સામે વધતી ઉંમરે પણ કંઈક નવું કરવાનું જોમઃ વહુ-સાસુની જોડીની કમાલ.