કાંઠેથી જા તું જા, દરિયે...તું દરિયેથી જા તું જા, તળિયે...

‘ગોતી લો, તમે ગોતી લો’ આજકાલ ભારતીય ફરંદાઓનું લાગે છે એક જ લક્ષ... દ્વીપ પર જાવું તો ભારતના જ... એ પણ રળિયામણા લક્ષદ્વીપે જાવું. એવું તે શું છે આ ટાપુસમૂહમાં, જે વડા પ્રધાનની આંખોમાં વસી ગયો ને જેનાં વખાણ કરતાં સેલિબ્રિટીથી લઈને પ્રવાસપ્રેમીઓ થાકતાં નથી.

- કેતન મિસ્ત્રી

આદિત્ય ગઢવીના કંઠમાંથી રેલાયેલું, સૌમ્ય જોશી લિખિત, અચિંત ઠક્કર સ્વરાંકિત ખલાસીગીતની લોકપ્રિયતા ઓસરવાનું નામ લેતી નથી. દેશના, ભાષાના સીમાડા વટાવી ગયેલું ચારણી શૈલીનું આ ગીત લાખો સંગીતપ્રેમીઓએ માણ્યું, હજી માણી રહ્યા છે.

આ ગીતનો આ ક્ષણે ઉલ્લેખ કરવાનું પ્રયોજન છે આપણા વડા પ્રધાન. વસ્તુ એવી બની કે ૨૦૨૪ના સરસમજાના અરુણા પ્રભાતે, બીજી જાન્યુઆરીએ વડા પ્રધાન નરેન્દ્ર મોદી ટાપુસમૂહ લક્ષ્મીપ ગયા. ત્યાં દરિયાકાંઠે એ ટહેલતા હોય, નિરાંતજીવે ખુરસીમાં બેઠા હોય તથા સ્નોર્કેલિંગ માટે સજ્જ થતા હોય એવી એમની તસવીરો વાઈરલ થઈ... તસવીરોની સાથે આ ટાપુસમૂહનો મહિમા વર્ણવતાં પ્રધાન મંત્રીએ કહ્યું કે ભાઈઓ અને બહેનો, લક્ષદ્વીપ ફરવા જાઓ...

યા મોદી સાહેબન દરમિયાન કાંઠેથી જા તું જા, દરિયે... દરિયેથી જા તું જા, તળિયે... સ્વચ્છ સાગરકાંઠા, તાડનાં ઝાડનાં ઝુંડવાળા લક્ષદ્વીપ અને પીએમની તસવીરો ચોમેર ફેલાઈ એ સાથે જાતજાતની પ્રતિક્રિયા પણ આવી. મોટા ભાગની પ્રતિક્રિયા મોદી સાહેબને બિરદાવતી જ આવી. પ્રોબ્લેમ શરૂ થયો માલદીવ્સના રાજકારણીઓનાં પેટમાં ગરમાગરમ તેલ રેડાયા બાદ, જેમ કે માલદીવ્સનાં યૂથ એમ્પાવરમેન્ટ-ઈન્ફર્મેશન-કલ્ચર મિનિસ્ટર ભારતદ્વેષી મરિયમ શિઉનાએ પીએમ વિશે ઉટપટાંગ કમેન્ટ કરી ત્યાંથી. જો કે થોડી વારમાં એમણે એમનું લખાણ દૂર કર્યું, પણ ત્યાં સુધીમાં મરિયમ અને એમના જેવા માલદીવ્સના અમુક રાજકારણીઓને જે નુકસાન થવાનું હતું એ થઈ ચૂક્યું હતું. માલદીવ્સ સરકારે સ્ટેટમેન્ટ બહાર પાડ્યું કે આ લોકોએ બફાટ કર્યો એની પર સરકારની મહોર નથી, અમે એમની સાથે સંમત નથી... એ પછી માલદીવ્સ-લક્ષદ્વીપનો મુદ્દો ટ્રેન્ડ થઈ ગયો અર્થાત્ એની પર જાતજાતના લોકો જાતજાતની પ્રતિક્રિયા આપવા લાગ્યા. બોલીવૂડ આખાએ એક્સ (પહેલાંના ટ્વિટર) પરથી સંદેશનો મારો ચલાવ્યોઃ ફેન્ટાસ્ટિક લક્ષદ્વીપ, તમે પણ જાઓ, હવે માલદીવ્સ જાય એ બીજા... વગેરે. બોલીવૂડની સાથે અન્ય સેલિબ્રિટીઓએ પણ આમાં સૂર પુરાવ્યો. તો ટ્રાવેલ પોર્ટલ ઈઝમાયટ્રિપના સ્થાપક-સીઈઓ નિશાંત પિત્તીએ એમની કંપનીએ લીધેલાં માલદીવ્સનાં બધાં ફ્લાઈટ બુકિંગ રદ કરવાની જાહેરાત કરી દીધી.