નક્સલવાદનો ખાતમો? હા, શક્ય છે!

જમીનદારો અને મૂડીવાદીઓનાં શોષણમાંથી મુક્ત કરાવવાના નામે આંદોલન ચલાવનારા નક્સલી આગેવાનોના બદઈરાદા સમજી ગયેલા લોકો હવે વિકાસનાં ફળ ચાખીને આતંકનો રસ્તો છોડી રહ્યા છે. આ જ કારણે સરકારને આશા બંધાઈ છે કે..

- હીરેન મહેતા

ગૃહમંત્રી અમિત શાહઃ નક્સલવાદથી મુક્તિ બહુ દૂર નથી!

દુઃખનું ઓસડ દહાડા.. એવું આપણે ઘણી વાર બોલીએ છીએ. જો કે બધાં દુઃખ-દર્દ સમય વીતતાં આપોઆપ ઓછાં થાય એવું જરૂરી નથી. એની દવા પણ કરવી પડે. અમુક સમસ્યા પણ એવી જટિલ હોય છે કે વર્ષોનાં વર્ષ ખેંચાયા કરે અને ગૂમડાની જેમ પીડા આપ્યા કરે.

ગરીબી, નિરક્ષરતા, બેરોજગારી, પામતા પહોંચતા લોકો દ્વારા સમાજના પછાત વર્ગનું શોષણ, વગેરે આવી કેટલીક સમસ્યા છે, જે આપણે વર્ષોથી ભોગવતાં આવ્યા છીએ. અંગ્રેજો કે બીજી વિદેશી પ્રજાઓ ભારતમાં આવી એ પહેલાં આવા પ્રશ્નો નહીં હોય એમ માની લેવું ભૂલભરેલું છે. વર્ણના આધારે સમાજના વર્ગભેદ એનું જ એક ઉદાહરણ હતું. આ વર્ગભેદ હજી નાબૂદ થયો નથી એ હકીકત પરથી એનાં મૂળ કેટલાં ઊંડાં છે એની કલ્પના કરી શકાય છે.

વખતોવખત દેશના જુદા જુદા વિસ્તારોમાં વર્ગભેદ અને એને કારણે સમાજના અમુક લોકો પર થતાં દમન સામે આંદોલન થયાં. અંગ્રેજો સામેની લડતમાં ખાસ તો મહાત્મા ગાંધીજીએ સ્ત્રીઓની જેમ આવા અનેક શોષિત-પીડિત લોકોને જોડ્યા એટલે દેશ આઝાદ થયો ત્યારે એમને પોતાનું શોષણ બંધ થવાની આશા બંધાઈ હતી, જે કમનસીબે પૂર્ણ ન થઈ. રાજ બદલાયું, પણ લોકોની પીડા યથાવત્ રહી. દેશ લોકશાહી બન્યો, પરંતુ શાસન કરવાનો અધિકાર તો જૂજ લોકોને જ મળ્યો. બીજા કરોડોના ભાગે તો અંગ્રેજને બદલે દેશી શાસકો આવ્યા એટલો જ ફરક હતો. સરવાળે દેશ આઝાદ થયો એ પછીય પ્રજા ગુલામ જ રહી.