આ વખતે પણ ભરોસાની સરકાર કે પછી ભાજપનો મેળ નહીં પડે?

અગાઉ જેવો ચૂંટણીનો માહોલ નથી, પણ મતદાન તો કરવાનું જ છે. સવાલ એ છે કે એકધારાં સત્તાવીસ વર્ષથી કમળ પર પસંદગી ઉતારનારા ગુજરાતના મતદારો આ વખતે પણ ભાજપને ‘ફિર એક બાર’ તક આપશે કે પરિવર્તનના ભાગ રૂપે કોંગ્રેસને વિજયી બનાવશે? અને ગુજરાતની પ્રજાએ ભાગ્યે જ જેને સ્વીકાર્યું છે એવા ત્રીજા પરિબળ તરીકે ‘આમ આદમી પાર્ટી’ કેટલું ગજું કાઢશે?

- કેતન ત્રિવેદી (અમદાવાદ)

વિખ્યાત રશિયન રાજનીતિજ્ઞ નિકિતા ક્રુશ્ર્ચોવનું એક સરસ વિધાન છેઃ રાજકારણીઓ બધે સરખા જ હોય. એ લોકો એવી જગ્યાએ પુલ બાંધવાનું વચન આપે છે, જ્યાં નદી જ ન હોય!

બસ, ગુજરાતમાં આજકાલ આ જ ચાલી રહ્યું છે. ભાજપ, કોંગ્રેસ અને આમ આદમી પાર્ટી સહિત તમામ રાજકીય પક્ષો રંગબેરંગી વચનોથી મતદારો પર સમરકંદ બુખારા ઓવારી રહ્યા છે. શાસક પક્ષ ભાજપે ૨૭ વર્ષના શાસન પછી પણ સંકલ્પપત્રના નામે નવાં વચનોનો પટારો ખોલ્યો છે, જેમાં ૨૫,૦૦૦ કરોડનું કૃષિ સિંચાઈ નેટવર્ક, નવી સરકારી કૉલેજોનું નિર્માણ, આઈઆઈટીની જેમ જીઆઈટી એટલે કે ગુજરાત ઈન્સ્ટિટ્યૂટ ઑફ ટેક્નોલૉજી, યુવાનોને ૨૦ લાખ રોજગારી, યુનિફૉર્મ સિવિલ કોડ, ૩૦૦૦ કિલોમીટર લાંબો પરિક્રમાપથ, દ્વારિકા કોરીડોર જેવા પ્રોજેક્ટ્સની સાથે ગુજરાતના અર્થતંત્રને એક ટ્રિલિયન ડૉલરનું અર્થતંત્ર બનાવવાના વાયદા ચૂંટણીબજારમાં વહેતા કર્યા છે.

ટૂંકમાં, મતદાર સામો મળે એટલે માગ માગ માગે એ આપું એવો માહોલ અત્યારે ગુજરાતમાં છે. ચિત્રલેખાનો આ અંક તમારા હાથમાં હશે ત્યારે ગુરુવાર, ૧ ડિસેમ્બરના રોજ સૌરાષ્ટ્ર-કચ્છ અને દક્ષિણ ગુજરાતની ૮૯ બેઠક પરનું તો મતદાન પૂરું થઈ ચૂક્યું હશે અને ૫ ડિસેમ્બરના બીજા તબક્કાની ૯૩ બેઠક માટેનો પ્રચાર એના અંતિમ ચરણમાં હશે.

આંકડાઓ પર એક નજર નાખીએ તો, પહેલા તબક્કામાં કચ્છ તથા સૌરાષ્ટ્ર અને દક્ષિણ ગુજરાતના મળી ૧૯ જિલ્લાની ૮૯ બેઠક પર કુલ ૨.૩૯ કરોડ મતદારો પોતાના પ્રતિનિધિની પસંદગી કરશે તો બીજા તબક્કામાં ઉત્તર અને મધ્ય ગુજરાતના ૧૪ જિલ્લાના ૨.૫૨ કરોડ મતદારો કયા ૯૩ પ્રતિનિધિઓને ધારાસભામાં મોકલવા એ નક્કી કરશે. બન્ને તબક્કામાં કુલ ૪.૯૧ કરોડ · મતદારો છે, જેમાં ૨.૫૩ કરોડ પુરુષ, ૨.૩૭ કરોડ મહિલા અને ૧૩૯૧ નાન્યતર જાતિના મતદારો છે. વિધાનસભામાં જવા ઈચ્છુક એવા કુલ ૧૬૨૧ ઉમેદવારે આ જંગમાં ઝંપલાવ્યું છે, જેમાં ૧૪૮૨ પુરુષ અને ૧૩૯ મહિલા ઉમેદવારોનો સમાવેશ થાય છે. હવે ૧ અને ૫ ડિસેમ્બરે ૫૧,૮૩૯ મતદાન મથકો પર ઈવીએમનાં જે બટન દબાશે એમાં એમનું ભાવિ નક્કી થશે.