വികാരങ്ങളുടെ കുടമാറ്റങ്ങൾ

അച്ചടക്കത്തിന്റെ ഭാഗമായി അവശ്യംവേണ്ട വിമർശനത്തിന്റെയും ശിക്ഷയുടെയും ശിക്ഷണത്തിന്റെയും അഭാവം വ്യക്തിത്വത്തിന്റെ അനാരോഗ്യകരമായ വളർച്ചയ്ക്ക് വളമാകാൻ സാധ്യതയുണ്ട്

- ഡോ.അദിതി എൻ. റിട്ട.അസോസിയേറ്റ്-പ്രൊഫസർ മനഃശാസ്ത്രവിഭാഗം എം.ജി.കാളജ്, തിരുവനന്തപുരം

ഒരു യുവതി ചെറുപ്പക്കാരനായ മനശ്ശാസ്ത്രവിദഗ്ധനെ കാണാനെത്തി. നിറപ്പകിട്ടുള്ള വസ്ത്രവും ആകർഷകമായ അലങ്കാരങ്ങളും അവരുടെ യുവത്വത്തിന് മാറ്റുകൂട്ടി. എന്നാൽ, പ്രണയഭംഗവും കടുത്ത വിഷാദ അനുഭവങ്ങളുമാണ് അവർ വിശദീകരിച്ചത്. നഷ്ടബോധത്തിൽ അവർ വിങ്ങിപ്പൊട്ടി. എന്നാൽ, കാഴ്ചയിലും സംസാരത്തിലുമുള്ള പൊരുത്തക്കേടുകൾ ചികിത്സകനെ കുഴക്കി. കാമുകനോട് ഇപ്പോൾ തോന്നുന്ന വികാരങ്ങൾ എന്തൊക്കെയാണെന്ന് വിശകലനം ചെയ്യാൻ ശ്രമിച്ചപ്പോൾ, യുവതിയുടെ വാക്കുകളിലും വികാരങ്ങളിലും ദേഷ്യവും അവജ്ഞയും പകയും കടന്നുവന്നു. അയാളുടെ ജീവിതം നശിപ്പിക്കാൻ മാത്രമാണ് ഇനിയുള്ള തന്റെ ജീവിതം എന്ന ചിന്തയിലേക്ക് അവർ നീങ്ങിത്തുടങ്ങി. നിരാശയിൽ നിന്ന് അവരെ മടക്കിക്കൊണ്ടുവരാൻ ആ ബന്ധത്തിലെ ആനന്ദത്തിന്റെ അവസരങ്ങൾ ഓർമിക്കാൻ ചികിത്സകൻ ആവശ്യപ്പെട്ടു. അപ്പോൾ അവരുടെ മുഖം ക്രമേണ പ്രകാശമാനമായി. ആദ്യമായി കണ്ടുമുട്ടിയ രംഗവും അനുരാഗത്തിന്റെ ദിനങ്ങളും വർണിക്കുമ്പോൾ നാണം കൊണ്ട് ആ മിഴികൾ കൂമ്പി, കവിളുകൾ തുടുത്തു. രണ്ടുമണിക്കൂറോളം നീണ്ടുനിന്ന ആദ്യത്തെ സെഷൻ തീരാറായപ്പോൾ, പ്രത്യാശയുടെ കിരണങ്ങൾ അവരിൽ നിറയ്ക്കണം എന്ന ഉദ്ദേശ്യത്തോടെ ചികിത്സകൻ ഭാവിപരിപാടികളിലേക്ക് അവരുടെ ചിന്തയെ നയിച്ചു. ഉപദേശങ്ങൾക്കും ചർച്ചകൾക്കും ഒടുവിൽ, പോകാൻ തുടങ്ങവേ അവർ പറഞ്ഞു: ആദ്യമായി പരിചയപ്പെടുകയാണെങ്കിലും, നിങ്ങളെ എനിക്കിഷ്ടപ്പെട്ടു. നിങ്ങൾ സുന്ദരനും ചെറുപ്പക്കാരനും ആരോഗ്യവാനും ആണ്. നിങ്ങൾ എന്നെ നന്നായി ശ്രദ്ധിക്കുന്നുണ്ട്. മനസ്സിലാക്കുന്നുണ്ട്. നിങ്ങൾക്കും എന്നെ ഇഷ്ടപ്പെട്ടുവെന്ന് തോന്നുന്നു. നമുക്ക് എന്തുകൊണ്ട് വിവാഹിതരായിക്കൂടാ?