കുത്തിവെപ്പെടുത്തിട്ടും എന്തുകൊണ്ട് പേവിഷബാധ

കുത്തിവെപ്പെടുത്തിട്ടും എന്തുകൊണ്ടാണ് അപൂർവമായിട്ടെങ്കിലും പേവിഷബാധ ഉണ്ടാകുന്നത്? ഇതിനുള്ള കൃത്യമായ കാരണം കണ്ടെത്താൻ സമഗ്രമായ ശാസ്ത്രീയപഠനം അനിവാര്യമാണ്

- ഡോ.രാജീവ് ജയദേവൻ വൈസ്ചെയർമാൻ, റിസർച്ച്സെൽ കേരളസ്റ്ററ്റ്ഐ.എം.എ.

സംസ്ഥാനത്ത് ഈ വർഷം ഇതിനകം ഒന്നര ലക്ഷത്തോളം പേർക്കാണ് പട്ടിയുടെ കടിയേറ്റതെന്നാണ് റിപ്പോർട്ട്. പേവിഷ ബാധയേറ്റ് ജീവൻ നഷ്ടമായത് 21 പേർക്ക് ഏറെ ദുഃഖകരമായ വാർത്തയാണിത്. ഇവരിൽ ചിലരെങ്കിലും വാക്സിൻ എടുത്തവരാണ് എന്നുള്ളത് ഏറെ ആശങ്ക ഉണ്ടാക്കിയിട്ടുണ്ട്. വാക്സിൻ എടുത്തിട്ടും അപൂർവമായെങ്കിലും പേവിഷബാധ ഉണ്ടാവാനുള്ള പൊതുവായ കാരണങ്ങൾ നമ്മൾ ശരിയായി മനസ്സിലാക്കേണ്ടതാണ്. എന്നാൽ കേരളത്തിലുണ്ടായ മരണങ്ങളെപ്പറ്റിയുള്ള പഠനങ്ങൾ നടന്നുവരുന്നതേയുള്ളൂ.

നായയുടെ കടിയേറ്റാൽ പേവിഷബാധ ഏൽക്കാതിരിക്കാൻ ചെയ്യേണ്ട പ്രധാന കാര്യങ്ങൾ ആദ്യം പറയാം.

കുത്തിവെപ്പ് എത്രയും വേഗം

കടിയേറ്റോ മാന്തിയോ മുറിവുണ്ടായാൽ രണ്ടുതരം മരുന്നുകളാണ് കുത്തിവയ്ക്കുന്നത്.

1. റാബിസ് വാക്സിൻ നിർവീര്യമാക്കിയ റാബിസ് വൈറസ് ആണത്. ഇനാക്ടിവേറ്റഡ് (inactivated) വാക്സിൻ എന്ന് പറയും.

2. RIG അഥവാ റാബിസ് ഇമ്മ്യൂണോഗ്ലോബുലിൻ അഥവാ 'റെഡിമെയ്ഡ് ആന്റിബോഡി.

ഈ കുത്തിവെപ്പുകൾ രണ്ടും വ്യത്യസ്തരീതിയിലാണ് പ്രവർത്തിക്കുന്നത്. വാക്സിൻ നമ്മുടെ പ്രതിരോധനിരയെ ഉണർത്തും. ഒരാഴ്ചയ്ക്കകം ആന്റിബോഡികളും മറ്റും ശരീരം ഉത്പാദിപ്പിച്ച് തുടങ്ങും. ശരീരത്തിലെവിടെയെങ്കിലും വൈറസ് എത്തിയിട്ടുണ്ടകിൽ അവ അത് കൈകാര്യം ചെയ്തുകൊള്ളും. വൈറസ് വളരെ പതിയെ സഞ്ചരിക്കുന്നതിനാൽ, ലക്ഷ്യസ്ഥാനമായ തലച്ചോറിൽ എത്തുന്നതിന് മുൻപുതന്നെ നമ്മുടെ പ്രതിരോധ സംവിധാനം അതിനെ കീഴ്പ്പെടുത്തും.

വാക്സിൻ ഇൻട്രാ ഡെർമൽ ആയോ (ചർമത്തിൽ കൊതുക് കടിച്ചതുപോലെ തടിപ്പുണ്ടാക്കുന്ന കുത്തിവെപ്പ്) അല്ലെങ്കിൽ കോവിഡ് വാക്സിൻ എടുത്തതു പോലെ ഇൻട്രാ മസ്കുലാർ ആയോ കൊടുക്കാവുന്നതാണ്.

കടിയേൽക്കുന്നത് ഏത് ഭാഗത്താണെന്നുള്ളത് ഏറെ പ്രധാനപ്പെട്ട വിഷയമാണ്. കാലിലെ നാഡിയിൽനിന്ന് തലച്ചോറിലേക്ക് കുറെയധികം ദൂരമുണ്ട്. വൈറസിനെ സംബന്ധിച്ച് ആഴ്ചകൾ നീളുന്ന യാത്രയാണിത്. എന്നാൽ മുഖത്തോ മറ്റോ ആണ് കടിയേൽക്കുന്നതെങ്കിൽ പെട്ടെന്ന് തന്നെ തലച്ചോറിലേക്ക് എത്താം. അതിനാൽ അത്തരം മുറിവുകൾക്ക് റിസ്ക് കൂടുതലാണ്. മുഖത്തും മറ്റും ആഴത്തിൽ കടിയേറ്റവരിൽ പിൽക്കാലത്ത് പേവിഷബാധ ഉണ്ടായിട്ടുണ്ട്. വാക്സിൻ എടുത്തവരിലും അപൂർവമായെങ്കിലും.