ഭാരം കൂട്ടല്ലേ ശരീരത്തിനും മനസ്സിനും

 ശരീരത്തിന്റെയും മനസ്സിന്റെയും അമിത ഭാരം ഒരുപോലെ കുറയ്ക്കാനാണ് ശ്രമിക്കേണ്ടത്. രണ്ടിന്റെയും ഭാരം കുറഞ്ഞാലേ, ജീവിതയാത്ര സുഖകരവും സുരക്ഷിതവുമാകൂ

- 

അഷ്ടവൈദ്യന്മാരിൽ പ്രമുഖനായിരുന്ന വയസ്ക്കര അച്ഛൻ മൂസിനെക്കുറിച്ച് ഐതിഹ്യമാലയിൽ ഒരു കഥയുണ്ട്. ഒരിക്കൽ, അമിതവണ്ണംമൂലം ഒന്നനങ്ങാൻ പോലുമാകാത്ത ഒരു രോഗിയുമായി ബന്ധുക്കൾ മൂസതിനടുത്തെത്തി. രോഗവിവരങ്ങൾ സശ്രദ്ധം കേട്ടശേഷം അദ്ദേഹം പറഞ്ഞു: “ഇയാൾക്കിനി ചികിത്സയൊന്നും വേണമെന്ന് തോന്നുന്നില്ല. മുപ്പതുദിവസത്തിനകം ഇയാൾ മരിച്ചുപോകും. ഇനി ആയുസ്സിന്റെ ബലംകൊണ്ട് മരിക്കാതെയിരിക്കുകയാണെങ്കിൽ, ഒരുമാസം കഴിഞ്ഞ് വരിക. വീട്ടിലെത്തിയശേഷം രോഗിക്ക് ഊണുമില്ല, ഉറക്കവുമില്ല. തീറ്റ ഭ്രാന്തനായിരുന്നയാൾ ഭക്ഷണം കുറച്ചു. എന്തിനേറെ പറയുന്നു. ഒരുമാസം കഴിഞ്ഞപ്പോഴേക്കും ദുർമേദസ്സെല്ലാമൊഴിഞ്ഞ് കൃശഗാത്രനായി. വീണ്ടും മൂസതിനടുത്തെത്തിയപ്പോൾ, അദ്ദേഹം പറഞ്ഞു: “ഇപ്പോൾ നിങ്ങൾക്ക് രോഗമൊന്നുമില്ല. ഇതുപോലെ ആവശ്യത്തിനുമാത്രം ഭക്ഷണം കഴിച്ച് പതിവായി വ്യായാമവും ചെയ്ത് ജീവിച്ചാൽ മതി!

മനസ്സും ശരീരവും തമ്മിലുള്ള അഭേദ്യമായ ബന്ധത്തെയാണ് ഈ കഥ സൂചിപ്പിക്കുന്നത്. 'എന്താ ആകെ കോലം കെട്ട് പോയല്ലോ!' ആധിപിടിച്ച് ഓടിനടക്കുന്ന സുഹൃത്തിനോട് നാം ചോദിക്കാറില്ലേ? പിരിമുറുക്കത്തെ തുടർന്നുണ്ടാകുന്ന സ്ട്രെസ് ഹോർമോണുകളും തകിടംമറിഞ്ഞ ജീവിതച്ചിട്ടകളുമാണ് ഇങ്ങനെയുള്ള അവസ്ഥയുണ്ടാക്കുന്നത്.

പിരിമുറുക്കത്തിന്റെ ചൂടിൽ വെന്തുരുകി, മെലിഞ്ഞുണങ്ങു ന്നതുപോലെ മറിച്ചും സംഭവിക്കാം. മാനസികസമ്മർദവും വിഷാദവുമൊക്കെ അനുഭവിക്കുന്നവർ സമ്മർദത്തെ മറികടക്കാനായി വാരിവലിച്ച് തിന്നെന്നും വരാം. ആ സമയത്തെ അമിതഭക്ഷണം മൂലം ശരീരം തടിച്ചുവീർക്കുകയാണ് ചെയ്യുന്നത്.

ശരീരത്തിന്റെയും മനസ്സിന്റെയും അമിത ഭാരം ഒരുപോലെ കുറയ്ക്കാനാണ് ശ്രമിക്കേണ്ടത്. കാരണം, ശരീരവും മനസ്സും ഒരു നാണയത്തിന്റെ ഇരുപുറം പോലെ പരസ്പരപൂരകങ്ങളാണ്. രണ്ടിന്റെയും ഭാരം കുറഞ്ഞാ ലേ, ജീവിതയാത്ര സുഖകരവും സുരക്ഷിതവുമാകൂ. ആരോഗ്യമുള്ള ശരീരത്തിൽ ആരോഗ്യമുള്ള മനസ്സുണ്ടാകുന്നതു പോലെ, മനസ്സിന്റെ സ്വസ്ഥത ഉറപ്പാക്കി ശാരീരികാരോഗ്യം നിലനിർത്താനാണ് നാം ശ്രമിക്കേണ്ടത്.

ശരീരഭാരവും മനസ്സും