ചെവിയിലെ രോഗങ്ങൾ

അണുബാധകൾ, ശരീരത്തിന്റെ തുലനനിലയെ തകരാറിലാക്കുന്ന പ്രശ്നങ്ങൾ തുടങ്ങി പലതരം രോഗാവസ്ഥകൾ ചെവിയെ ബാധിക്കാം

- ഡോ.അനീഷ്അസീസ് അസിസ്റ്റന്റ്പ്രൊഫസർ ഇ.എൻ.ടി.വിഭാഗം ഗവ.മെഡിക്കൽകോളേജ്, കോട്ടയം

ചെവിയെ ബാധിക്കുന്ന പ്രധാനപ്പെട്ട രോഗങ്ങളും പ്രതിരോധ മാർഗങ്ങളും ഇവയാണ്.

കൊളസ്റ്റിയോട്ടമ

മധ്യകർണത്തെ ബാധിക്കുന്ന അപകടകരമായ രോഗാവസ്ഥയാണ് കൊളസ്റ്റിയോട്ടമ (Cholesteatoma). ചെവിക്കല്ല്  (Ear Drum)ഉള്ളിലേക്ക് വലിഞ്ഞ് ഒരു സഞ്ചിയുടെ സാക് രൂപത്തിലായി അതിന്റെ ഉള്ളിൽ അഴുക്ക് അടിഞ്ഞു കൂടുകയും തുടർന്ന് ഇത് വികസിച്ച് ചുറ്റുപാടുമുള്ള ഭാഗങ്ങളെ ബാധിക്കുകയുമാണ് ചെയ്യുന്നത്. മധ്യകർണത്തിലെ ശ്രവണാസ്ഥികൾ, ആന്തരിക കർണം തുടങ്ങി തലച്ചോറിനെ വരെ ഇത് ബാധിക്കാം. കേൾവി, ബാലൻസ്, മുഖത്തെ പേശികളുടെ പ്രവർത്തനങ്ങൾ തുടങ്ങിയവയെയെല്ലാം ഇതോടെ അവതാളത്തിലാകും.

കൊളസ്റ്റിയോട്ടമ ഉണ്ടാകുന്നതിന് പല കാരണങ്ങളും പറയുന്നുണ്ടെങ്കിലും ശാസ്ത്രീയ തെളിവുകളോടെയുള്ള കാരണങ്ങൾ ഇതുവരെ കണ്ടെത്തിയിട്ടില്ല.

ലക്ഷണങ്ങൾ

ചെവിയിൽ നിന്ന് ദുർഗന്ധം, കേൾവിക്കുറവ്, തലചുറ്റൽ എന്നിവയാണ് പ്രധാന ലക്ഷണങ്ങൾ. പഴുപ്പ് നന്നേ കുറവായിരിക്കും.

സങ്കീർണതകൾ

ചികിത്സിച്ചില്ലെങ്കിൽ ഉടൻ രോഗം ഗുരുതരമാവും. ചെവിക്കല്ല്, ശ്രവണാസ്ഥികൾ, മസ്തിഷ്കത്തിലെ അസ്ഥികൾ എന്നിവയെ ബാധിക്കാനിടയാകും. ചെവിയിൽ കടുത്ത അണുബാധ, ആന്തരകർണത്തിൽ നീർക്കെട്ട്, മുഖപേശികൾക്ക് തളർച്ച, മസ്തിഷ്കത്തിന് തകരാറുണ്ടാക്കുന്ന മെനിഞ്ചൈറ്റിസ്, മസ്തിഷ്കത്തിൽ പഴുപ്പ് അടിയുന്ന ബ്രെയിൻ അബ്സസ്സ് എന്നിവയൊക്കെയാണ് സങ്കീർണതകൾ.

രോഗനിർണയം

ഓട്ടോസ്കോപ്പ് ഉപയോഗിച്ചുള്ള ചെവി പരിശോധനയിലൂടെ രോഗം തിരിച്ചറിയാനാകും. എം.ആർ.ഐ. സ്കാൻ കൂടി എടുത്ത് രോഗാവസ്ഥ ഉറപ്പാക്കിയശേഷമാണ് ചികിത്സ ആരംഭിക്കുക.

ചികിത്സ

ഈ രോഗാവസ്ഥയിൽ ശസ്ത്രക്രിയ അനിവാര്യമാണ്. മരുന്നുകൾ ഗുണം ചെയ്യുകയില്ല. രോഗാവസ്ഥ നേരത്തെ കണ്ടുപിടിക്കുന്നത് ചികിത്സയുടെ ഫലം വർധിപ്പിക്കാൻ സഹായിക്കും. പ്രാഥമികഘട്ടത്തിൽ ശസ്ത്രക്രിയ ചെയ്താൽ വളരെ ഗുണം ലഭിക്കും. രോഗം മൂലം ശ്രവണാസ്ഥികൾക്ക് തകരാർ സംഭവിച്ചിട്ടുണ്ടെങ്കിൽ അത് പരിഹരിക്കാൻ ഓസികുലോപ്ലാസ്റ്റി (Ossiculoplasty) എന്ന ശസ്ത്രക്രിയ വേണ്ടിവരും.

രോമകൂപത്തിലെ അണുബാധ