પૂજારી બની ગયા સરકારી અધિકારી

ઉત્તર પ્રદેશની યોગી સરકારને પૂજાપાઠની સરકાર કહેવામાં આવે છે. તેમના બધા નિર્ણયો ધર્મકર્મ સાથે જોડાયેલા હોય છે. કાંવડ યાત્રા દરમિયાન યાત્રીઓ પર હેલીકોપ્ટરથી ફૂલ વરસાવવા, રસ્તાને ધોવાની સાથેસાથે અયોધ્યામાં દર વર્ષે દિવાળીના સમયે દીપોત્સવ ઉજવવો અને દર વર્ષે ઉજવણીના રેકોર્ડ બનાવવાને ખાસ યાદ કરવામાં આવે છે

- શૈલેન્દ્ર સિંહ

વર્ષ ૨૦૨૪ ની લોકસભા ચૂંટણીનું પ્રચાર અભિયાન ઉત્તર પ્રદેશમાં શરૂ થઈ ગયું છે. ભાજપાની કેન્દ્રની મોદી સરકારને લગભગ ૧૦ વર્ષ અને ઉત્તર પ્રદેશની યોગી સરકારને ૬ વર્ષ પૂરા થઈ ગયા છે તેમ છતાં ભાજપા ચૂંટણીમાં રામના નામના સહારે જવા ઈચ્છે છે.

આ વાતને સમર્થન આપતા ચૈત્ર મહિનાની નવરાત્રિમાં ઉત્તર પ્રદેશ સરકારે અયોધ્યામાં રામ જન્મોત્સવ ઊજવવાનું કામ કર્યું અને નવરાત્રિમાં પૂજા પૂરા રાજ્યમાં ધાર્મિક આયોજનો કરવામાં આવ્યા. આ આયોજનોનો હેતુ માત્ર જનતાનું ધ્યાન અપરાધ, મોંઘવારી, બેરોજગારી જેવા ગંભીર મુદ્દાથી હટાવવાનું હતું.

ઉત્તર પ્રદેશમાં વિકાસના નામે તૂટેલાફૂટેલા રસ્તા છે, જેને લઈને ભાજપાના ધારાસભ્ય યોગેશ શુક્લાએ પોતાની ફરિયાદ નોંધાવી હતી. જોકે આવા બધા મોટા મુદ્દા પર લોકોનું ધ્યાન ન જાય, તે કારણથી પૂજાપાઠનો સહારો લેવામાં આવી રહ્યો છે.

જે જિલ્લાધિકારીને જિલ્લાના વિકાસ અને કાયદાવ્યવસ્થાનું કામ જોવાનું હતું, તે હવે મંદિરમાં પૂજાપાઠની વ્યવસ્થા જોવાનું કામ કરી રહ્યા છે. પૂજાપાઠ માટે તેઓ ગાનાર અને દેવીદેવતાનું રૂપ ધરનારાને શોધી રહ્યા છે. એટલું જ નહીં, સંસ્કૃતિ વિભાગના અધિકારીઓ તેની દેખરેખમાં લાગી ગયા છે. જોકે રામચરિતમાનસનો વિરોધ કરનાર સમાજવાદી પાર્ટી આ વાત પર મૌન રહી છે અને કોંગ્રેસનો અવાજ કોઈ સાંભળે તેમ નથી.

ડીએમ સાહેબના હાથમાં વ્યવસ્થા