ഫാൽക്കെ പുരസ്ക്കാര നിറവിൽ മോഹൻലാൽ

1980 ലെ മഞ്ഞിൽ വിരിഞ്ഞ പൂക്കൾ മുതൽ 2025 ലെ ഹൃദയ പൂർവ്വം വരെ വ്യത്യസ്തമായ എത്രയോ വേഷങ്ങളിലാണ് ഈ നടൻ പകർന്നാട്ടം നടത്തിയിരിക്കുന്നത്

- എൻ.ടി. സതീഷ്

അഭിനയം ഒരു തീർത്ഥാടനമാക്കി ലക്ഷ്യസായൂജ്യം കൈവരിച്ച കലാകാരനാണ് മോഹൻലാൽ. മലയാള സിനിമയ്ക്ക് ഇന്ത്യൻ ചലച്ചിത്രകല യുടെ പരമോന്നത ബഹുമതിയായ ദാദാസാഹേബ് ഫാൽക്കേ പുരസ്ക്കാരം രണ്ടാമത് മോഹൻലാലിലൂടെ കൈവന്നതു തന്നെ ആ തീർത്ഥാടനയാത്രയെ അദ്ദേഹം വൈവിധ്യവും നിരന്തര കഠിനാദ്ധ്വാനമാക്കിയതിന്റെ ഫലമാണ്. അത്രമാത്രം മോഹൻലാലിന്റെ ചലച്ചിത്രയാത്ര അവിസ്മരണീയമാംവിധം തലമുറകളെ പ്രചോദിപ്പിക്കുന്നു എന്നത് വാക്കുകൾക്കതീതമായ അത്ഭുതമാണ്. അസാമാന്യപ്രതിഭയുള്ള നടൻ എന്നതിലുപരി നിർമ്മാതാവും സംവിധായകനുമാണ് മോഹൻലാൽ. അവ്വിധത്തിൽ ഇന്ത്യൻ സിനിമയുടെ വളർച്ചയ്ക്കും വികാസത്തിനും നൽകിയ അതുല്യ സംഭാവനകൾ പരിഗണിച്ചാണ് 2023 ലെ ഫാൽക്കെ പുരസ്ക്കാരം ഇപ്പോൾ ലാലിന് നൽകുന്നത്. 2004 ൽ സംവിധായകൻ അടൂർ ഗോപാലകൃഷ്ണന് ലഭിച്ച് രണ്ട് പതിറ്റാണ്ടാകുമ്പോഴാണ് ഈ ദേശീയ ബഹുമതി മലയാളസിനിമയിലേയ്ക്ക് വീണ്ടും എത്തുന്നത്. അതിലൂടെ കേരളം ഫാൽക്കെ നിറവിൽ അഭിമാനത്താൽ ഒരിക്കൽക്കൂടി വിനീതയാകുകയും ഹർഷപുളകിതയാകുകയും ചെയ്യുന്നു.

മോഹൻലാലിലെ നടനെ പലരും പല വിശേഷണ പദങ്ങൾ കൊണ്ട് അലങ്കരിക്കാറുണ്ട്. കംപ്ലീറ്റ് ആക്ടർ, ഫ്ളെക്സിബിൾ ആക്ടർ എന്നൊക്കെ. അത് ഏത് കഥാപാത്രത്തെയും സംവിധായകൻ ആഗ്രഹിക്കുന്ന, നിർദ്ദേശിക്കുന്ന രീതിയിൽ ഭാവസന്നിവേശം നടത്താനുള്ള ലാലിലെ അനിതരസാധാരണമായ കഴിവു കൊണ്ട് ലഭ്യമായതാണ്. അത്രയ്ക്ക് അഭിനയകലയെ അയന സുന്ദരവും അനായാസവുമാക്കിയ കലാകാരനാണ് മോഹൻലാൽ. ആക്ഷനും കട്ടിനുമിടയിൽ താൻ താനല്ലാതാകത്തക്കവിധം പ്രേക്ഷകന്റെ ആസ്വാദന രസരമുകുളങ്ങളെ ത്രസിപ്പിക്കക്കവിധം കഥാപാത്രത്തിലേയ്ക്ക് അപ്രതീക്ഷിത ഭാവചാരുത പകരാനും ജീവൻ പകരാനും മോഹൻലാലിന് പല ചിത്രങ്ങളിലൂടെയും കഴിഞ്ഞിരുന്നു. അഭിനയത്തിന്റെ അക്കാദമിക് തലങ്ങളിലെ യാതൊരു പരിശീലനവും അതിന്റെ ജാഡയും ശിരസ്സിലേറ്റാതെ തികച്ചും വിനയാന്വിത മായി ഏത് ജീവിതസാഹചര്യത്തെയും അഭിമുഖീകരിക്കുകയും അതിനെ സൂക്ഷ്മമായി അവതരിപ്പിച്ചു ഫലിപ്പിക്കാനും മോഹൻലാലിലെ നടൻ എപ്പോഴും ശ്രദ്ധിച്ചിരുന്നു. ആ നിരന്തര ജാഗ്രതയാണ്, പ്രതിഭയാണ് ലാലിനെ ചലച്ചിത്രരംഗത്തെ സമഗ്രസംഭാവനയ്ക്കുള്ള ബഹുമതിയിലേയ്ക്ക് അടുപ്പിച്ചിരിക്കുന്നത്.