ചെറിയ തുടക്കം

കഥക്കൂട്ട്

- തോമസ് ജേക്കബ്

ഇന്നു ലോകം മുഴുവൻ വ്യാപിച്ചിരിക്കുന്ന ഗൂഗിളിന്റേതു പോലെ എളിയ ഒരു തുടക്കം എത്ര പേർക്ക് അവകാശപ്പെടാൻ കഴിയും?

ഡോക്ടറേറ്റ് എടുക്കാൻ സാൻഫഡ് സർവകലാശാലയിൽ ചേർന്ന സുഹൃത്തുക്കളായ ലാറി പേജും, സെർജി ബിന്നും ഒരു വീടിന്റെ ഗാരിജ് വാടകയ്ക്കെടൂത്ത് 1998 ൽ ആരംഭിച്ചതാണ് ഈ കമ്പനി. ഡോക്ടറേറ്റിന്റെ കാര്യം പോക്കായങ്കിലും കമ്പനി കോടികൾ കൊയ്തു.

കലിഫോർണിയയിൽ സൂസൻ എന്നയാളിന്റെ ഗാരിജ് മാത്രമല്ല വീടും ഗൂഗിൾ കമ്പനി വിലയ്ക്കെടുത്ത് സ്മാരകമാക്കിയിരിക്കുകയാണ്.

ജർമനിയിലെ രണ്ടു സഹോദരന്മാരായ അഡോൾഫ് ഡാസ്ലറും റുഡോൾഫ് ഡാസ്ലറും. 1920 കളിൽ അമ്മയുടെ അലക്കുമുറിയിൽ ഒരു ഷൂ കമ്പനി ആരംഭിച്ചു. ആ ഷൂ ധരിച്ച് ഓടിയ പലരും ഒളിംപിക് ജേതാക്കളായതോടെ 1930കളിൽ അതൊരു വലിയ കമ്പനിയായെങ്കിലും ഒരു തെറ്റിദ്ധാരണയുടെ പേരിൽ അവർ തമ്മിൽ തെറ്റി. അവർ പിന്നീട് പരസ്പരം മത്സരിച്ച് ആരംഭിച്ച കമ്പനികളാണ് അഡിഡാസും പൂമയും.

ചെരുപ്പു നിർമാണം കുലത്തൊഴിലായ കുടുംബത്തിലെ തോമസ് എന്നയാൾ 1894ൽ ആരംഭിച്ച ചെറിയ ചെരിപ്പു കടയാണ് പിൽക്കാലത്ത് ലോക വിപണികൾ കീഴടക്കിയ ബാറ്റ ഷൂ കമ്പനിയായി വളർന്നത്.