ചങ്ങലം പരണ്ട എന്ന പ്രകൃതിദത്ത ഔഷധശാല

ഏതെങ്കിലും ഗുരുതരമായ ആരോഗ്യപ്രശ്നങ്ങൾക്ക് ഉപയോഗിക്കുന്നതിന് മുമ്പ് ഒരു വൈദ്യോപദേശം തേടുന്നത് ഉചിതമായിരിക്കും

- 

അഡാമന്റ് ക്രീപ്പർ എന്ന് അറിയപ്പെടുന്ന ചങ്ങലംപരണ്ടയുടെ ശാസ്ത്രീ യനാമം സിസ്സസ് ക്വാഡ്രാംഗുലാരിസ് എന്നാണ്. വിറ്റേസി കുടുംബത്തിൽപ്പെട്ട, വള്ളിയായി മരങ്ങളിൽ പടർന്നു കയറുന്ന ഒരു ചെടിയാണ് ചങ്ങലംപരണ്ട. നാലു മൂലകളുള്ള നീണ്ട ക്യാളുകളുടെ ചങ്ങല പോലെയാണ് ഈ സസ്യം കാണപ്പെടുന്നത്. അതുകൊണ്ടാണ് ഇതിനെ ചങ്ങലംപരണ്ട എന്ന് വിളിക്കുന്നത്. ഓരോ സന്ധികളിൽ നിന്നും ഇലകളും എതിർഭാഗത്ത് നിന്നും സ്പ്രിംഗ് പോലുള്ള പിടിവള്ളികളും പുറപ്പെടുന്നു. ഈ ചെടിയുടെ പൂക്കൾ വളരെ ചെറുതാണ്. ചുവന്ന കായ്കൾക്കുള്ളിൽ ഒരു വിത്തുണ്ടായിരിക്കും. ഇതിൽ ധാരാളം കാൽസ്യം, വിറ്റാമിൻ സി, വിറ്റാമിൻ ഇ, കരോട്ടിനോയിഡുകൾ, ടാന്നിൻസ്, ഫിനോൾസ് തുടങ്ങിയ ആന്റി ഓക്സിഡന്റ് സംയുക്തങ്ങൾ അടങ്ങിയിട്ടുണ്ട്. എല്ലുകളുടെയും സന്ധികളുടെയും ആരോഗ്യം വർദ്ധിപ്പിക്കുക, ഒടിവുകളും ചതവുകളും വേഗത്തിൽ ഭേദമാക്കാൻ സഹായിക്കുക, അസ്ഥിക്ഷയം തടയുക, ആർത്തവ പ്രശ്നങ്ങൾക്കും ചെവി വേദനയ്ക്കും ആശ്വാസം, വിശപ്പില്ലായ്മ, ദഹനക്കുറവ് എന്നിവയ്ക്കും ഇത് പ്രതിവിധിയാണ്.