પરદુઃખે ઉપકાર કરે તોયે મન અભિમાન ન આણે રે...

એકવીસમી સદીના વીસમા વર્ષે એ છાને પગલે આવી. શરૂ શરૂમાં એ ખાસ ઉપદ્વવી લાગી નહોતી, પણ જ્યારે વડા પ્રધાન નરેન્દ્ર મોદીએ ૨૧ દિવસની તાળાબંધી જાહેર કરી ત્યાર બાદ ખબર પડી કે એ એટલે કે ચીનથી દુનિયામુખીમાં પહોંચી ગયેલી ‘કોવિડ-૧૯’ નામની મહામારી તો સોએક વર્ષના માનવઈતિહાસમાં ન જોયેલી, અનુભવાયેલી વિપદી હતી. ૨૦૨૦ની ૨૪ માર્ચે વડા પ્રધાને કોવિડ–૧૯ પેન્ડેમિકને નાથવા સૌપ્રથમ ૨૧ દિવસના જડબેસલાક લૉકડાઉનની જાહેરાત કરી એ સાથે સવા અબજ ભારતીયોનાં જીવનચક્ર થંભી ગયાં. અમીર-ગરીબમધ્યમવર્ગી-આબાલવૃદ્ધ સૌને શારીરિક-આર્થિકમાનસિક રીતે ભાંગી નાખતા આ ચેપી વાઈરસ અને લૉકડાઉનના ઉપદ્રવ-ઉભવનાં માર્ચમાં બે વર્ષ પૂરાં થઈ રહ્યાં છે ત્યારે ‘ચિત્રલેખા'એ એક પહેલ આદરી છે મહાઆપત્તિમાં પ્રગટેલા માણસાઈ દીવાને ઉજાગર કરવાની, એમની ઉચિત નોંધ લેવાની. આગામી અંકોમાં આવી માનવમનને સ્પર્શતી કથા પ્રગટ થતી રહેશે. આ વખતે અનુભવીએ મનોરંજનજગત સાથે સંકળાયેલા કલાકારોના નિઃસ્વાર્થભાવની સેવાના સ્વર અને સૂર... અને હા, ‘ચિત્રલેખા'ના વાચકો પણ આમાં જોડાઈ શકે છે એમની આસપાસ પ્રગટેલા આવા દીવડા પ્રત્યે આંગળી ચીંધીને. મોકલી આપો તમારા અનુભવ અમને ઈ-મેઈલ [e-mail] દ્વારા

- કેતન મિસ્ત્રી (મુંબઈ) જવલંત છાયા (રાજકોટ) મહેશ શાહ (અમદાવાદ)

શરદ પૂર્ણિમા પછીની એક રઢિયાળી રાતે રાજકોટ-જામનગર હાઈ–વે પર સડસડાટ જતા એક વાહનને પોલીસે ઊભું રખાવ્યું, કેમ કે વાહન માઈક, સ્પીકર, વગેરે સાજ-અસબાબની હેરફેર માટેનું હતું અને જાહેર કાર્યક્રમ હજી એટલા થતા નહોતા. તો પછી આ વાહન જાય છે ક્યાં? એવી શંકાથી પૂછપરછ થઈ. જો કે વાહનમાં સાઉન્ડ ઈક્વિપમેન્ટ્સને બદલે રાશન કિટના ઢગલા હતા, જે જામનગરના કલાકારો માટ