எங்களோடது Blind love

“போதைப் பழக்கத்திற்கு அடிமையான ஒருவனைக் கையாள்வது அத்தனை சுலபமில்லை.

- மகேஸ்வரி நாகராஜன் ஆ.வின்சென்ட் பால்

நான் இன்று உன்னதமாக மாறிக்கொண்டு இருப்பதற்கும், நாளை உயர்வாகப் போவதற்கும் ஒரே காரணம் என் மனைவி கீதா. மன நல மருத்துவர்களும், மருத்துவமனைகளும் தோற்றுப்போன என் விஷயத்தில், எதுவுமே செய்யாத ஒன்றை என் மனைவி செய்தார். அதுதான் அன்கண்டிஷனல் லவ். ப்ளைன்ட் லவ். என் கத்தல்... என் புலம்பல்... எல்லாவற்றையும் பார்த்தவர் அவர்” எனக் கவிஞரும் பாடலாசிரியருமான கார்த்திக் நேத்தா தனது மனைவி கீதாவை நோக்கி விரல் நீட்ட... அவர்களின் காதல், கல்யாணம் குறித்தெல்லாம் கீதா கார்த்திக் நேத்தாவிடம் பேசியதில்...

“இதே மாதிரியான ஒரு ஜூலை மாதம் அது. வெயிலும் இல்லாத மழையும் இல்லாத பொழுதில், மேக மூட்டத்துடன் தூரல் அங்கொன்றும் இங்கொன்றுமாய் விழுக, அந்த நாள் ஏதோ ஒன்றை சொல்ல வருகிற மாதிரியான உணர்வை எனக்குத் தந்துகொண்டே இருந்தது. அப்போது எனது முகநூல் பக்கத்தில் நட்பு அழைப்பு ஒன்று வர, அதில் பெயர் கார்த்திக் நேத்தா என்றிருந்தது. அந்தப் பெயர் எனக்கு பரிச்சயமானதாய் இருந்தது. அவ்வளவுதான். ஆனால், அவர் ஒரு கவிஞர், பாடலாசிரியர் என எதுவும் எனக்குத் தெரியாது.

நட்பை ஏற்று, அவரின் முகப்பில் நுழைந்து யாரென அறிய முற்பட்டேன். ஊர் சேலம் என்பது மட்டுமே கண்ணில் பட்டது. சேலத்தில் நடக்கும் இலக்கியக் கூட்டங்களில் நானும் பங்கேற்பேன். பேசுவேன். சேலத்தில் இருந்த எழுத்தாளர்களை ஓரளவு தெரியும் என்பதால், “சேலமா?” எனக் கேட்டு குறுஞ்செய்தி ஒன்றை அனுப்ப, பதிலுக்கு “ஆமாம் கீதா” என்றார் அவர்.

தெரிஞ்சவுங்களைதானே பெயர் சொல்லிப் பேசுவோம். இவர் கீதா அன்னு சொன்னதும், ஏற்கனவே இலக்கியக் கூட்டங்களில் என்னைத் தெரியுமோ என நினைத்து, “என்னைத் தெரியுமா?” என மீண்டும் குறுஞ்செய்தி அனுப்ப, “இல்ல கீதா, இப்பதான் தெரியும்” என்றார். (...) சிறிது நேரத்திலேயே எங்களுக்குள் தகவல் பரிமாற்றம் அதிகரித்தது. “ஓ, நீங்க பாடலாசிரியரா?” என்றேன். அப்போது இந்து ஆங்கில நாளிதழில் வந்த அவரின் நேர்காணலை அனுப்பி, அவரின் கைபேசி எண்களையும் அனுப்பினார். அந்த நேர்காணலில், அவர் எழுதிய திரைப் பாடல்கள், அவர் எழுதிக்கொண்டிருக்கும் படத்தின் பாடல்கள் என எல்லாத் தகவல்களும் இருந்தது.