സ്വീകാര്യതയുടെ അവസാന വാക്ക്

സത്യ സന്ധത, സുതാര്യത. സമാനതകളില്ലാത്ത നേതൃത്വ മികവും ഭരണനിർവഹണ ശേഷിയും കൊണ്ട് പി.എ. മുഹമ്മദ് റിയാസ് കേരളത്തിന്റെ ശ്രദ്ധാകേന്ദ്രമാകുന്നു.

- സജിൽ ശ്രീധർ

കേരളീയ പൊതുസമൂഹത്തിൽ പി.എ. മുഹമ്മദ് റിയാസിന്റെ പ്രസക്തി എന്താണ്? പല തലങ്ങളിലേക്ക് വ്യാപരിച്ച് കിടക്കുന്നതാണ് ഈ ചോദ്യത്തിനുളള ഉത്തരം.

സാങ്കേതകാർത്ഥത്തിൽ റിയാസ് കേരളത്തിന്റെ പൊതുമരാമത്ത് ടൂറിസം വകുപ്പ് മന്ത്രിയാണ്. സി.പി.എമ്മിന്റെ യുവനേതാക്കളിൽ ഏറ്റവും ശക്തനും സ്വീകാര്യനുമാണ്. ഡി.വൈ.എഫ്.ഐ. ദേശീയ അദ്ധ്യക്ഷൻ എന്ന നിലയിൽ മികച്ച പ്രകടനം കാഴ്ച ശക്തിയാണ്. അതിനപ്പുറം കേരളീയ ജനതയുടെ മനസിൽ അദ്ദേഹം എവിടെ നിൽക്കുന്നു എന്ന് പരിശോധിക്കപ്പെടേണ്ടതുണ്ട്.

രണ്ടാം പിണറായി സർക്കാരിനെ ഒന്നാം പിണറായി സർക്കാരുമായി പൊതുസമൂഹം താരതമ്യപ്പെടുത്തുകയും പല വിമർശനങ്ങളും ഉയർന്ന് വരികയും ചെയ്തിരുന്നു. അതിൽ ഏറ്റവും പ്രധാനം പുതിയ മന്ത്രിമാർ ഒന്നടങ്കടം ഭരണ രംഗത്ത് നവാഗതരായതുകൊണ്ട് അവരുടെ പരിചയക്കുറവ് ഭരണതലത്തിൽ പ്രതിഫലിക്കുന്നു എന്നതാണ്. അതിന്റെ നിജസ്ഥിതി എന്ത് തന്നെയായിരുന്നാലും അത്തരമൊരു പ്രതിച്ഛായ സൃഷ്ടിക്കുന്നതിൽ പ്രതിപക്ഷം അടക്കം വിജയിച്ചു. എന്നാൽ അവിടെയെല്ലാം ഒറ്റപ്പെട്ട് നിന്ന ഒരു മന്ത്രിയുണ്ടായിരുന്നു. പി.എ. മുഹമ്മദ് റിയാസ്.