ആ പ്രസംഗം വഴിത്തിരിവായി

വഴിത്തിരിവ് പ്രൊഫ. എം.കെ. സാനു

- ഉമ ആനന്ദ്

നവതി കഴിഞ്ഞിട്ടും വിശ്രമമില്ലാതെ എഴുത്തും പ്രസംഗവും ഉദ്ഘാടനവുമായി ഓടി നടക്കുന്ന ഒരാളെ ഇപ്പോൾ കേരളത്തിലുള്ളൂ. ആയിരം ഉറുപ്പിക ശമ്പളമുള്ള ജോലി വേണ്ടെന്ന് വച്ച് അറുപത് രൂപ ശമ്പളമുള്ള അധ്യാപകവൃത്തി സ്വീകരിച്ച അദ്ദേഹത്തിന് ലോകമെങ്ങും ശിഷ്യരാണ്. ഒരാൾക്ക് ഒരിക്കലേ ആത്മഹത്യ ചെയ്യാനാവൂ എന്ന കാരണം പറഞ്ഞ് രണ്ടാമതും എം.എൽ.എ. ആവാനുള്ള അവസരം വേണ്ടെന്നു വച്ച ഒരാളേ കേരളത്തിലുള്ളൂ. മലയാളത്തിന്റെയും മലയാളിയുടേയും അഭിമാനമായ എം.കെ. സാനു മാഷ് താൻ പിന്നിട്ട വഴികൾ ഓർത്തെടുക്കുന്നു.

“എന്റെ ഒൻപത് പതിറ്റാണ്ട് കാലത്തെ ജീവിതത്തിനിടയിൽ വഴിത്തിരിവ് എന്ന് പ്രത്യേകമായി എടുത്തുപറയാൻ മാത്രം അധികം സംഭവങ്ങളൊന്നും ഉണ്ടായിട്ടില്ല. എന്നാൽ ഒന്നു രണ്ടു കാര്യങ്ങൾ ഉണ്ടായിട്ടുണ്ടുതാനും.

ഞാൻ തിരഞ്ഞെടുത്ത വഴി അധ്യാപനമായിരുന്നു. കാരണം എനിക്കിഷ്ടപ്പെട്ടത് അതുമാത്രമായിരുന്നു. ആലപ്പുഴയിലും തിരുവനന്തപുരത്തുമായിരുന്നു പഠനം. പഠിക്കുന്നതോടൊപ്പം അവധി ദിവസങ്ങളിൽ തിരുവനന്തപുരത്ത് ധാരാളം സിനിമകളും കാണാറുണ്ടായിരുന്നു. ഇംഗ്ലീഷും മലയാളവും ഹിന്ദിയും ധാരാളം കണ്ടിരുന്നു.