கல்யாண ரீல்ஸ்... எஸ்கேப் மாப்பிள்ளை!

இன்றைய காலகட்டத்தில் கைபேசிக்கும் அதில் உள்ள சமூக வலைத்தளத்திற்கும் குழந்தைகள் முதல் பெரியவர்கள் வரை அடிமையாகி விடுகின்றனர்.

- -வரிப்பையூரான்

பொழுதுபோக்காக தொடங்கும் சமூக வலைத்தள பயன்பாடு முழு நேர வேலையாகவே மாறி விடுகிறது. அதனால் செய்ய வேண்டிய வேலையும் மறந்து விடுகிறது, சிலருக்கு வாழ வேண்டிய வழியும் மாறிவிடுகிறது. இப்படித்தான் ரீல்ஸ் மயக்கத்தில் ஹரியானா பெண் ஒருவர் தன் மன வாழ்க்கையை தொலைத்துள்ளார். ரீல்ஸ் எடுக்கும் பழக்கம் உள்ள இவர், தனது திருமண நாளன்று மாலை மாற்றுவதற்கு வராமல் தோழியர்களுடன் ரீல்ஸ் எடுத்துக் கொண்டிருந்திருக்கிறார். பொறுத்துப் பொறுத்துப் பார்த்த மணமகன் பொங்கியெழ, திருமணம் நிறுத்தப்பட்டுள்ளது.

இது இப்படி என்றால்... யூடியூபில் அழகி ஒருவர் சமூக வலைதளம் மூலம் சம்பாதித்த பணத்தை, அதே சமூக வலைதள வீடியோவால் இழந்த சம்பவமும் அரங்கேறியுள்ளது.

மத்திய பிரதேசத்தைச் சேர்ந்த யூடியூபர் ரச்சனா குர்ஜாருக்கு சமூக வலைதளத்தில் ஒருலட்சத்திற்கும் மேற்பட்ட பாலோயர்கள் உள்ளனர். இவரது முழுநேர வேலையே தனது யூடியூப் பக்கத்தில் குடியிருக்கும் வீடு, அறைகள், தன்னிடம் இருக்கும் தங்க நகை, பணம் ஆகியவற்றை படம் பிடித்து வீடியோ போட்டு வியூசை அள்ளுவதுதான்.

ஒரு வீடியோவில் தனது வீட்டின் நுழைவுவாயில் முதல் அறைகள் வரை அனைத்தையும் காட்டி தனது ஆடம்பர வாழ்க்கையை பதிவு செய்திருந்தார்.

இந்நிலையில் கடந்த வாரம் ரச்சனா குர்ஜாரின் வீட்டுக்குள் புகுந்த முகமூடி திருடர்கள், தூங்கிக் கொண்டிருந்த குடும்ப உறுப்பினர்கள் அறையை வெளிப்புறமாக பூட்டிவிட்டு... வீட்டில் இருந்த நகை, பணத்தை கொள்ளையடித்துச் சென்றனர். கொள்ளையர்கள் தங்களது அடையாளம் தெரியாமல் இருக்க, சி.சி.டி.வி. கேமராக்களையும் அடித்து நொறுக்கிவிட்டு சென்று உள்ளனர்.

இனி தனது வீட்டில் கொள்ளைபோன நிகழ்வையும் வீடியோ எடுத்து போட்டாலும் போடுவார் ரச்சனா. விட்டதை விட்ட இடத்தில் தானே பிடிக்கனும்.