கல்லூரிகளில் சினிமா விழாக்கள்... என்ன அவசியம்?

கல்லூரிகளில் பட விழாக்கள் நடத்துவது என்பது கடந்த சில ஆண்டுகளில் டிரெண்ட்டாகி விட்டது. முக்கியமாக கோலிவுட்டின் டாப் நடிகர்களின் திரைப்படங்களின் இசை வெளியீட்டு விழாக்கள் பெரும்பாலும் சென்னை புறநகர் கல்லூரிகளில் அதிகளவில் நடைபெற்று வருகின்றன.

- 

ஆம்... மாணவர்களுக்கு ஒழுக்கம், நன்னெறியை போதிக்க வேண்டிய பள்ளி, கல்லூரிகள் இன்று ஆன்மீக சொற்பொழிவாற்றும் சனாதன கூடங்களாகவும், சினிமா ஆர்வத்தைத் தூண்டும் சர்ச்சைக்குரிய கேளிக்கை கொண்டாட்ட மேடைகளாகவும் உருமாறி வருகிறது.

விஜய் நடிப்பில் வெளியான பிகில் திரைப்படத்தின் ஆடியோ வெளியீட்டு விழா சென்னை புறநகரில் உள்ள சாய்ராம் கல்லூரியில் நடைபெற்றது.

அந்த விழாவில் ‘யாரை எங்கு உட்கார வைக்க வேண்டுமோ. அங்கு உட்கார வைக்க வேண்டும்’ என்று குட்டிக்கதையுடன் விஜய் பேச, அது அன்றைய ஆளும் கட்சியை கோபத்துக்கு உள்ளாக்கியது.

இதன் எதிரொலியாக அந்த கல்லூரிக்கு நோட்டீஸ் அனுப்பப்பட்டது.

இந்த சர்ச்சைக்குப் பிறகும் கூட விஜய்யின் ‘சர்க்கார்' பட வெளியீட்டு விழா அதே சாய்ராம் கல்லூரியில் தான் நடைபெற்றது.

சர்க்கார் படத்தில் கூட, இலவச மிக்ஸி, கிரைண்டர் ஆகியவற்றை தீயில் தூக்கிப் போடும் காட்சிக்காக கடும் எதிர்ப்பு உருவானது.

இந்த வரிசையில் ரஜினியின் ‘பேட்ட' திரைப்படத்தின் இசை வெளியீட்டு விழா தனியார் கல்லூரியில் தான் நடைபெற்றது.

நடிகர் தனுஷ் நடிப்பில் வெளியான மாரி 2, திருச்சிற்றம்பலம், ராயன் மற்றும் கடைசியாக வெளியான குபேரா வரையில் பல திரைப்படங்களின் ஆடியோ லாஞ்ச் தனியார் கல்லூரிகளில் தான் நடைபெற்றுள்ளன.

சிவகார்த்திகேயன் நடிப்பில் வெளியான மாவீரன், அமரன் போன்ற படங்களின் இசை வெளியீட்டு விழா நிகழ்சிகளும் சாய்ராம் கல்லூரியில் தான் நடைபெற்றது. உண்மையில், கல்வி நிறுவனங்களில் திரைப்பட இசை வெளியீட்டு விழாக்களை பிரம்மாண்டமாக நடத்துவதன் பின்னணியில் வியாபார நோக்கங்கள் அதிகம் உண்டு.

உதாரணத்திற்கு, நேரு ஸ்டேடியம் போல ஒரு இடத்தை தேர்வு செய்து, விழாவுக்காக பிரமாண்ட செட் போட்டு, ஸ்பெஷல் பாஸ் கொடுத்து கூட்டத்தைக் கூட்டுவது என்பது சவாலான காரியமாக இருக்கும். இதற்கு நிறைய ஆள் பலமும், பொருட்செலவும் தேவைப்படுகிறது.

அதே நேரத்தில், கல்லூரிகளில் திரைப்பட விழாக்களை நடத்தும் போது அதற்கென்று தனியாக ஆடிட்டோரியம் உண்டு.

ஆயிரக்கணக்கான மாணவர்களே அங்கு ஆடியன்ஸ் ஆக மாறுகின்றனர். ரசிகர்களின் கைதட்டல், ஆரவாரத்தில் நடிகர்களும் உச்சிக் குளிர்ந்து போகிறார்கள்.