வறியவர்களை வாட்டி வதைக்கும்

வங்கி நடைமுறைகள்!

- -பரிதி

வங்கியில் பணம் போட்டாலே பாதுகாப்பு, வட்டியுடன் தொகை பெருகும் என்று ஒரு காலத்தில் வங்கியை நோக்கி சென்றோம். இப்போது வங்கியில் பணம் போட்டால் வங்கிக்கு முதல் பெருகுகிறது, அதோடு சேவை கட்டணம், அபராத கட்டணம் என்று ஆயிரம் கட்டணங்களை அவர்களாகவே நிர்ணயித்துக்கொண்டு நம்மிடம் இருந்து பிடுங்குகிறார்கள்.

வங்கியில் சேமிக்க மற்றொரு காரணம் கடன் வசதி. அதற்கும் வட்டி விகிதம் அதிகரிக்கப்பட்டுவிட்டது. அதோடு கடன் வழங்க அது விதிக்கும் நிபந்தனை வேறு உலகம் காணாப் புதுமையாக இருக்கிறது.

அந்த வரிசையில் தங்க நகை அடகு வைக்க புதிய நிபந்தனைகளை ரிசர்வ் வங்கி விதித்துள்ளது. அதாவது, தங்க நகையை அடமானம் வைப்பவர்கள், அதன் உரிமையாளர்கள் தாங்கள் தான் என்ற ஆதாரத்தை சமர்பிக்க வேண்டும்.

மேலும் வங்கிகள், தங்கத்தின் மீது கடன் வழங்கும்போது, அந்த தங்க நகையின் தரத்தை உறுதிப்படுத்த ஒரு தரச்சான்றிதழ் வேண்டும்.

வங்கிகளில் வாங்கப்பட்ட தங்க நாணயங்கள் மட்டுமே அடமானமாக ஏற்கப்படும். கடைகளில் வாங்கப்படும் தங்க நாணயம் செல்லாது. மேலும் கடன் ஒப்பந்தத்தில், அடமானமாக வைக்கப்பட்ட தங்கத்தின் விவரம், மதிப்பு, ஏல நடைமுறை போன்றவற்றை சேர்க்க வேண்டும்... இப்படி அடுக்கிக் கொண்டே போகிறார்கள் விதிமுறையை.

அந்த காலத்தில் நகை பட்டறைகளில் வாங்கிய நகை களுக்கு ஆதாரம் இருக்காது. அதேபோல் பல வருடம் முன்பு வாங்கிய நகைகளுக்கும் பில் இருக்காது. அப்படி நகைகளுக்கு பில் வாங்கியவர்களும் சில வருடங்கள் கூட பில்லை பாதுகாத்து வைக்க சாத்தியமில்லை.

இப்படிப்பட்ட சூழலில் நகை வாங்கிய பில்லையும் சமர்ப்பித்தால் மட்டுமே நகைக்கடன் என்ற விதிமுறை சாமானிய மக்களை அதிகம் பாதிக்கும் என்று எதிர்ப்பு எழுந்துள்ளது.

ஏற்கனவே கடந்த சில மாதங்களுக்கு முன்பு ரிசர்வ் வங்கி வெளியிட்ட புதிய கட்டுப்பாட்டின்படி, நகை மறு அடமானத்தை பாதித்தது.