ഇഷ്ടത്തിനോടുന്ന സ്ത്രീയാകേണ്ടേ?

നിരത്തിലൂടൊരു വാഹനം തനിച്ചോടിക്കുമ്പോൾ സ്ത്രീയിൽ നിറയുന്ന ആത്മവിശ്വാസം. അതിന് അതിരുകളില്ല. ഇരമ്പിയാർക്കുന്ന തെരുവിലൂടെ കാറ്റുപോലെ കടന്നുപോകുന്ന ആ നേരങ്ങളെപ്പറ്റി ചില പെണ്ണനുഭവങ്ങൾ...

- രജി ആർ. നായർ

ഇരുചക്ര വാഹനം ഒരു സ്ത്രീയാണ്. ഇത്തിരിയിടത്തിലൂടെ ജീവിച്ചു പോവാനറിയാം. ഒഴിഞ്ഞു മാറിയും വളഞ്ഞും പുളഞ്ഞും എങ്ങനെയും ബാലൻസ് കണ്ടെത്തി ലക്ഷ്യത്തിലെത്താനുള്ള ആ ഓട്ടമുണ്ടല്ലോ. അത് ഒരു പെണ്ണിലല്ലാതെ എവിടെ കണ്ടിരിക്കുന്നു നമ്മൾ.. എന്നിട്ടും സ്ത്രീ ടൂവീലറുമെടുത്ത് നിരത്തിലിറങ്ങുമ്പോൾ പലർക്കുമിഷ്ടമാവുന്നില്ല; ഇപ്പോഴും.

"വാഹനം ഓടിക്കുന്നത് പെണ്ണാണോ എങ്കിൽ മറ്റൊരു കാരണവും വേണ്ടാ അപകടത്തിന് എന്നു കരുതുന്നവർ മുതൽ, "അയ്യോ, പാവം പെണ്ണ്, അവളെ ഒന്ന് വീടുവരെ അനുഗമിച്ചേക്കാം' എന്നു ചിന്തിക്കുന്നവർ. ഇവർക്കു മുന്നിലൂടെയാണ് ഓരോ ദിവസവും ഓരോ സ്ത്രീയും വാഹനമോടിക്കുന്നത്. എന്നിട്ടുണ്ടോ അവൾക്കു വല്ല കുലുക്കവും. എന്തിനു കുലുങ്ങണം? ഇതും ഇതിലപ്പുറവും ചാടിക്കടന്നവളാണ് ഓരോ സ്ത്രീയും.

പെൺവണ്ടികൾ നിരത്തിലിറങ്ങിയ കാലം. കാണുന്നവർക്കൊരു അത്ഭുതമുണ്ട്. നാട്ടിൻപുറങ്ങൾ അത്ഭുതത്തിലും കവിഞ്ഞ ഒരു അവസ്ഥയിലാണ് അവളെ നോക്കിയത്. തീരെ സഹിക്കാഞ്ഞാൽ ആരെങ്കിലും ഒന്നുകൂവും. അതുകൊണ്ടും കാര്യമില്ലെങ്കിൽ ഉറക്കെ വിളിച്ചു പറയും. “നോക്ക്, പെണ്ണ് വണ്ടിയോടിക്കുന്നു...'' അങ്ങനെ നോക്കും കൂക്കും ഏറ്റുവാങ്ങേണ്ടി വന്നെങ്കിലും വണ്ടിയോടിക്കുന്നവർ ഒരു പ്രത്യേക ജനുസ്സായി കണക്കാക്കപ്പെട്ടു. നാണവും മാനവുമില്ലാത്തവർ എന്ന് നാട്ടുകാർ. ഭാഗ്യവതികൾ എന്ന് അസൂയക്കാർ. ഇതിനെല്ലാം ഇടയിലൂടെ അവർ അനായാസം വണ്ടിയോടിച്ചു. കണ്ടാലറിയാം വണ്ടിയോടിക്കുന്നവളത്ര ചെറിയ മീനല്ലെന്ന്. കർക്കിടകത്തിൽ കലങ്ങിയതോട്ടിലൂടെ നീർക്കോലിയോടുന്ന പോലൊരു പോക്കാണ്. കാലത്തിലൂടെ എത്ര ഓടിനടന്നിട്ടും അവൾ തട്ടിത്തടഞ്ഞു വീണുപോയിട്ടുമില്ല.

ആരുടേത് ഈ നിരത്ത്?