മാധവമാസം പുണ്യമാസം

മെയ് മാസമാണ് വൈശാഖമാസം. ഭഗവാൻ മഹാ വിഷ്ണുവിനെ ഉപാസിക്കാൻ ഏറെ വിശേഷപ്പെട്ട മാസമാണിത്. ഈ പുണ്യമാസത്തിൽ ഭഗവാൻ ലക്ഷ്മിദേവിയോടൊപ്പം വൈകുണ്ഠത്തിൽ നിന്നും വേഷപ്രച്ഛന്നനായി തന്റെ ഭക്തരുടെ ഭൂമിയിലുളള ഭവനങ്ങൾ സന്ദർശിക്കുമെന്നാണ് സങ്കൽപ്പം.

- എസ്.പി.ജെ

മാധവമാസമെന്നാണ് വൈശാഖ മാസത്തിന്റെ മറ്റൊരു നാമം. പ്രകൃതി പൂവണിയുന്ന കാലമാണിത്. പുണ്യകർമ്മങ്ങൾ അനുഷ്ഠിക്കാൻ വസന്തകാലം ഏറെ ഉത്തമമെന്ന് ആചാര്യവിധി. ഗുരുവായൂർ ക്ഷേത്രത്തിലെ ഏറ്റവും പ്രാധാന്യമുള്ള മാസമാണ് വൈശാഖമാസം. അക്ഷയതൃതീയ, പരശുരാമവതാര, അന്നപൂർണ്ണേശ്വരീയവതാര ദിനങ്ങൾ, നരസിംഹ ജയന്തി, ശങ്കരജയന്തി, ബുദ്ധ പൂർണ്ണിമ തുടങ്ങിയ പുണ്യദിനങ്ങൾ വൈശാഖ മാസത്തിലാണ്.

ഈശ്വരന്മാരുടെ ഈശ്വരനാണ് ഭഗവാൻ മഹാവിഷ്ണു. പ്രപഞ്ചത്തിന്റെ അധിപനും, സംരക്ഷകനും ഭഗവാനാണത്രേ. 'വിഷ്ണു' എന്ന പദത്തിന്റെ അർത്ഥം സർവ്വതിലും വ്യാപരിക്കുന്നവൻ, സർവ്വതും ഉൾക്കൊള്ളുന്നവൻ, സർവ്വചരാചരങ്ങളിലും നിറഞ്ഞിരിക്കുന്നവൻ എന്നിങ്ങനെയാണ്. തൂണിലും, തുരുമ്പിലും അവിടുന്ന് കുടിയിരിക്കുന്നു എന്നത് പ്രഹ്ലാദകഥയിലൂടെ വ്യക്തം. സമസ്ത ദേവതകൾ, സൂര്യ-ചന്ദ്രന്മാർ, നക്ഷത്രങ്ങൾ, ഗ്രഹങ്ങൾ, താരമണ്ഡലം, പഞ്ചഭൂതങ്ങൾ തുടങ്ങി സമസ്ത ബ്രഹ്മാ ണ്ഡത്തിന്റേയും നിലനിൽപ്പ് ഭഗവാനിൽക്കൂടിയാണ്.